शहादा,दि.०२
श्री संत शिरोमणी सेना महाराज यांच्या पुण्यतिथीनिमित्त आयोजित अखंड हरिनाम कीर्तन सप्ताह सोहळ्याचा शुभारंभ आज श्री गोकर्णेश्वर महादेव मंदिर प्रांगण, साईबाबा नगर, शहादा येथे अत्यंत भक्तिमय वातावरणात संपन्न झाला.
सप्ताहाच्या पहिल्या दिवशी प्रख्यात कीर्तनकार ह. भ. प. राज महाराज पडावदकर (पदवद, ता. शिंदखेडा, जि. धुळे) यांनी आपल्या ओजस्वी वाणीने आणि संतविचारांच्या प्रभावी निरूपणातून उपस्थित भाविकांना मंत्रमुग्ध केले. “कर्म हीच पूजा” या संत सेना महाराजांच्या जीवनतत्त्वज्ञानावर आधारित कीर्तनातून त्यांनी समाजात सदाचार, कर्तव्यनिष्ठा, व्यसनमुक्ती, संतसंग आणि हरिनामाचे महत्त्व अधोरेखित केले.कीर्तनादरम्यान विठ्ठल नामाच्या गजराने संपूर्ण परिसर भक्तिमय झाला होता. उपस्थित भाविकांनी टाळ-मृदुंगाच्या गजरात हरिनाम संकीर्तनाचा आनंद घेतला. “जय जय विठोबा रखुमाई”, “जय जय राम कृष्ण हरी” आणि “पुंडलिक वरदा हरी विठ्ठल” या जयघोषांनी वातावरण दुमदुमून गेले.या सप्ताहाच्या पहिल्या पुष्पाचे मुख्य यजमान अखिल भारतीय नाभिक समाजाचे अध्यक्ष मा. उद्धवरावजी मक्कन जांभळे होते. त्यांच्या वतीने प्राचार्य डॉ. उद्धव जाधव यांच्या हस्ते ह. भ. प. राज महाराज पडावदकर यांचा शाल, श्रीफळ व स्मृतिचिन्ह देऊन सत्कार करण्यात आला.यावेळी परिसरातील अनेक मान्यवर, वारकरी, महिला भगिनी, युवक तसेच मोठ्या संख्येने भाविक उपस्थित होते. सप्ताहाच्या यशस्वी आयोजनासाठी श्री. हेमराज प्रकाश पवार व सौ. ममताताई हेमराज पवार यांच्यासह सर्व सहकारी परिश्रम घेत आहेत.
दरम्यान, जे भाविक प्रत्यक्ष उपस्थित राहू शकत नाहीत त्यांच्यासाठी आयोजकांनी थेट प्रक्षेपणाची सुविधा उपलब्ध करून दिली आहे. त्यामुळे भाविकांना घरबसल्या कीर्तनाचा लाभ घेता येत आहे. या कार्यक्रमाचे सूत्रसंचालन प्रा. डॉ. अनिल साळुंके यांनी केले.सप्ताहातील पुढील दिवसांमध्ये विविध नामवंत कीर्तनकारांची कीर्तने आयोजित करण्यात आली असून, या भक्तिमय सोहळ्याचा लाभ घेण्यासाठी भाविकांनी मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे.
