सर्जा-राजाला सजवायचं कसं? बळीराजाच्या खिशाला महागाईचा चटका
प्रतिनिधी :
चातारी : वर्षभर शेतात नांगर ओढणाऱ्या, ऊन-पावसाची तमा न बाळगता शेतकऱ्याच्या खांद्याला खांदा लावून राबणाऱ्या सर्जा-राजाचा सण म्हणजे बैलपोळा. मात्र यंदा या पारंपरिक सणालाही महागाईची झळ बसली असून, सर्जा-राजाला सजवायचे कसे, असा प्रश्न बळीराजासमोर उभा ठाकला आहे.
पोळा जवळ आला की गावागावांत वेगळीच लगबग सुरू व्हायची. कुणी बैलांच्या शिंगांना रंग लावायचा, कुणी आकर्षक झुली आणायची, तर कुणी घुंगरू, दोर, गोंडे आणि हार-फुलांची खरेदी करायची. घराघरांत पुरणपोळी तसेच पारंपरिक पदार्थांची तयारी सुरू व्हायची. मात्र यंदा बाजारात खरेदीसाठी गेलेल्या शेतकऱ्याला साहित्याच्या किमती पाहून खिशाचा अंदाज घ्यावा लागत आहे.
“उत्पन्न अठन्नी, खर्चा रुपय्या” अशी परिस्थिती निर्माण झाल्याने सण साजरा करतानाही शेतकऱ्याला अनेकदा विचार करावा लागत आहे. बैलांच्या सजावटीचे साहित्य, रंग, गोंडे, झुली, घुंगरू, हार-फुले आणि पूजेच्या साहित्याच्या वाढलेल्या किमतीमुळे पोळ्याचा खर्च वाढला आहे.
आधीच खते, बियाणे, कीटकनाशके, डिझेल आणि मजुरीच्या वाढत्या खर्चामुळे शेतकरी आर्थिक अडचणीत आहे. त्यात आता सणासुदीच्या खर्चाची भर पडल्याने “आधीच दुष्काळ, त्यात तेरावा महिना” अशी परिस्थिती निर्माण झाली आहे.
ज्याच्या जीवावर शेतकऱ्याचा संसाराचा गाडा चालतो, त्या बैलांप्रती कृतज्ञता व्यक्त करण्याचा पोळा हा शेतकऱ्यांसाठी भावनिक सण आहे. त्यामुळे खर्च वाढला असला तरी अनेक शेतकरी आपल्या ऐपतीनुसार सर्जा-राजाची सजावट करून हा सण उत्साहात साजरा करण्याची तयारी करत आहेत.
मात्र वाढत्या महागाईमुळे पारंपरिक सणांचे स्वरूपही बदलत चालले असल्याची खंत शेतकरी व्यक्त करीत आहेत. बैलपोळा हा केवळ सण नसून शेतकरी आणि त्याच्या पशुधनातील जिव्हाळ्याचे नाते जपणारी परंपरा आहे. त्यामुळे महागाईच्या काळातही बळीराजाच्या या भावनेला शासनाकडून योग्य पाठबळ मिळावे, अशी अपेक्षा शेतकरी वर्गातून व्यक्त होत आहे.
