दुर्गंधी आणि आरोग्याचा प्रश्न; तातडीने साफसफाई करण्याची नागरिकांची मागणी
कल्याण : कल्याण येथील पाइपलाइन रोड परिसरात गटाराची योग्य प्रकारे साफसफाई होत नसल्याने गटाराचे सांडपाणी रस्त्यावर आल्याचे चित्र दिसून येत आहे. रस्त्यावर साचलेल्या सांडपाण्यामुळे नागरिकांना ये-जा करताना मोठ्या गैरसोयीचा सामना करावा लागत आहे.
या मार्गावरून लहान मुले, महिला, ज्येष्ठ नागरिक तसेच वाहनचालकांची मोठ्या प्रमाणात वर्दळ असते. मात्र रस्त्यावर साचलेल्या सांडपाण्यामुळे पादचाऱ्यांना मार्ग काढताना अडचणी येत आहेत. वाहनांची ये-जा झाल्यानंतर सांडपाणी उडत असल्याने नागरिकांनाही त्रास सहन करावा लागत असल्याचे स्थानिकांचे म्हणणे आहे.
रस्त्यावर सांडपाणी साचल्याने परिसरात दुर्गंधी निर्माण झाली असून, डासांचा प्रादुर्भाव वाढण्याची शक्यता आहे. त्यामुळे नागरिकांच्या आरोग्याचा प्रश्न निर्माण होण्याची भीती व्यक्त केली जात आहे.
संबंधित प्रशासनाने या समस्येची तातडीने दखल घेऊन गटाराची साफसफाई करावी, रस्त्यावर साचलेले सांडपाणी हटवावे आणि भविष्यात सांडपाणी रस्त्यावर येणार नाही यासाठी कायमस्वरूपी उपाययोजना करावी, अशी मागणी स्थानिक नागरिकांकडून होत आहे.
📍 ठिकाण : पाइपलाइन रोड, कल्याण
