साऊंड सिस्टिम उतरवताना लोखंडी सांगाडा कोसळला; ४५ वर्षीय महिलेचा दुर्दैवी मृत्यू
पिंपरी-चिंचवड | जुनी सांगवी : दहीहंडी उत्सवाचा जल्लोष संपल्यानंतर आवराआवर सुरू असतानाच जुनी सांगवी परिसरात घडलेल्या दुर्दैवी घटनेने उत्सवाला गालबोट लागले. दहीहंडी कार्यक्रमासाठी उभारण्यात आलेल्या लोखंडी संरचनेवरून साऊंड सिस्टिम खाली उतरविण्याचे काम सुरू असताना लोखंडी सांगाडा अचानक कोसळला.
या दुर्घटनेत घटनास्थळी उभ्या असलेल्या सलमा सलाउद्दीन पठाण (वय ४५) यांच्या अंगावर लोखंडी सांगाडा पडल्याने त्या गंभीर जखमी झाल्या. त्यांना उपचारासाठी नेण्याचा प्रयत्न करण्यात आला; मात्र या दुर्घटनेत त्यांचा दुर्दैवी मृत्यू झाला.
धक्कादायक बाब म्हणजे मृत सलमा पठाण यांचा मुलगाही याच दहीहंडी मंडळाचा कार्यकर्ता असल्याची माहिती समोर आली आहे. कुटुंबीयांनी पोलिसांत तक्रार दाखल करण्यास नकार दिल्याची माहिती मिळत आहे.
उत्सवाच्या आवराआवरीतही सुरक्षिततेची गरज
उत्सवाच्या काळात मोठी गर्दी, साऊंड सिस्टिम, उंच लोखंडी संरचना तसेच कार्यक्रमानंतरची आवराआवर यामध्ये सुरक्षिततेची योग्य काळजी घेणे अत्यंत महत्त्वाचे ठरते. या घटनेमुळे उत्सवाच्या तयारीपासून ते कार्यक्रमानंतरची आवराआवर पूर्ण होईपर्यंत सुरक्षेच्या उपाययोजनांकडे गांभीर्याने पाहण्याची गरज पुन्हा अधोरेखित झाली आहे.
उत्सवाचा आनंद घेताना सहभागी नागरिक, आयोजक आणि कामगार यांच्या सुरक्षिततेलाही तितकेच महत्त्व देणे आवश्यक आहे.
सलमा सलाउद्दीन पठाण यांना भावपूर्ण श्रद्धांजली. त्यांच्या कुटुंबीयांच्या दुःखात आम्ही सहभागी आहोत.
