ग्रामपंचायतीच्या कारवाईकडे ग्रामस्थांचे लक्ष
फोंडाघाट : फोंडाघाट येथे मच्छी विक्रीसाठी स्वतंत्र मच्छी मार्केट उपलब्ध असतानाही काही ठिकाणी रस्त्याच्या कडेला सर्रासपणे मासे विक्री होत असल्याचे चित्र पाहायला मिळत आहे. त्यामुळे वाहतूक, स्वच्छता आणि नागरिकांच्या आरोग्याचा प्रश्न निर्माण होत असल्याची चर्चा ग्रामस्थांमध्ये सुरू आहे.
रस्त्यावर मासे विक्री केल्यामुळे परिसरात दुर्गंधी निर्माण होण्याबरोबरच मासळीचे अवशेष रस्त्याच्या कडेला टाकले जात असल्यास स्वच्छतेचा प्रश्न गंभीर होऊ शकतो. तसेच रस्त्यावर ग्राहकांची गर्दी झाल्याने वाहतुकीलाही अडथळा निर्माण होण्याची शक्यता आहे.
मच्छी विक्रीसाठी स्वतंत्र मार्केट असताना रस्त्यावरच मासे विक्री का केली जाते? असा सवाल ग्रामस्थांकडून उपस्थित केला जात आहे.
या प्रकाराकडे फोंडाघाट ग्रामपंचायत प्रशासनाने गांभीर्याने लक्ष देऊन रस्त्यावरील मासे विक्रीवर कायदेशीर कारवाई करावी आणि मच्छी विक्रेत्यांना उपलब्ध मच्छी मार्केटमध्येच विक्री करण्याबाबत सूचना द्याव्यात, अशी मागणी ग्रामस्थांकडून होत आहे.
आता या प्रकरणी ग्रामपंचायत नेमकी काय कारवाई करणार? याकडे फोंडाघाट ग्रामस्थांचे लक्ष लागले आहे.
