बांबवडे प्रतिनिधी :
अन्न व औषध प्रशासनाचा (FDA) बोगस अधिकारी बनून ६० हून अधिक हॉटेल व्यावसायिकांना गंडा घालणाऱ्या महाभामट्याला कोल्हापूर पोलिसांच्या स्थानिक गुन्हे शाखेने (LCB) सापळा रचून रंगेहात बेड्या ठोकल्या आहेत. महादेव लोहार (रा. गोगवे, ता. शाहूवाडी) असे अटक करण्यात आलेल्या या तोतया अधिकाऱ्याचे नाव असून, त्याच्या या गुन्हेगारी कारनाम्यामुळे व्यावसायिक वर्गात तीव्र संताप व्यक्त केला जात आहे.
लक्ष्मीपुरी बाजारात आवळल्या मुसक्या
मिळालेल्या माहितीनुसार, लक्ष्मीपुरी बाजारात खंडणीची रक्कम उकळण्यासाठी आलेल्या महादेव लोहार याला पोलिसांनी क्षणाचाही विलंब न लावता जाळ्यात ओढले. मात्र, कारवाईची भनक लागताच त्याचा साथीदार प्रशांत यादव याने घटनास्थळावरून पळ काढला. पोलीस आता त्याचा कसून शोध घेत आहेत.
मुद्देमाल जप्त, टोळी उद्ध्वस्त!
पोलिसांनी संशयिताच्या ताब्यातून खंडणीची रोख रक्कम, मोबाईल आणि एक चोरीची मोटारसायकल असा एकूण ६२,००० रुपयांचा मुद्देमाल जागीच जप्त केला आहे.
कारवाईची भीती दाखवून प्रामाणिक व्यावसायिकांची लूट करणाऱ्या अशा भामट्यांचा पोलिसांनी पर्दाफाश केल्याने शहरात कौतुक होत आहे. फरार आरोपीलाही लवकरच गजाआड करून त्याची योग्य ती जागा दाखवून दिली जाईल, असा इशारा पोलिसांनी दिला आहे.
