सप्तशृंगीगड-नांदुरी घाटमार्ग १७ दिवस बंद रस्त्याच्या काँक्रिटीकरणासाठी १० ते २६ सप्टेंबरदरम्यान वाहतूक बंद;
सप्तशृंगी गड ते नांदुरी घाटमार्गावरील रस्त्याचे काँक्रिटीकरणाचे काम सुरू असल्याने हा मार्ग १० सप्टेंबर ते २६ सप्टेंबर २०२६ या कालावधीत वाहतुकीसाठी पूर्णपणे बंद ठेवण्याचे आदेश सहाय्यक जिल्हाधिकारी तथा उपविभागीय अधिकारी कळवण डॉ. कश्मिरा संखे यांनी दिले आहेत.
केंद्रीय मार्ग निधीअंतर्गत सप्तशृंगीगड-नांदुरी रस्त्याचे काँक्रिटीकरण सुरू आहे. घाटमार्गात काम सुरू असताना वाहतूक सुरू ठेवल्यास काम पूर्ण क्षमतेने व निर्धारित वेळेत पूर्ण करणे शक्य नसल्याचे सार्वजनिक बांधकाम विभागाने प्रशासनाच्या निदर्शनास आणून दिले होते. तसेच आगामी कुंभमेळा २०२७च्या पार्श्वभूमीवर सप्तशृंगी गड येथे भाविकांची मोठी गर्दी होण्याची शक्यता असल्याने रस्त्याचे काम वेळेत पूर्ण करण्यासाठी हा निर्णय घेण्यात आला आहे.
त्यानुसार १० सप्टेंबर रोजी सकाळी ७ वाजेपासून २६ सप्टेंबर रोजी रात्री १२ वाजेपर्यंत नांदुरी ते सप्तशृंगी गड घाटमार्ग वाहतुकीसाठी बंद राहणार आहे. नागरिकांच्या सुरक्षिततेच्या दृष्टीने संबंधित यंत्रणांनी आवश्यक ती खबरदारी घ्यावी, असे आदेशात नमूद करण्यात आले आहे.
रस्ता बंदचा आदेश तात्काळ प्रभावाने लागू करण्यात आला असून, संबंधित परिसरात आदेश प्रसिद्ध करण्याच्या सूचना देण्यात आल्या आहेत.
बोरगांव प्रतिनिधी जय गांगुर्डे
