“पक्षाने दाखविलेला विश्वास जनसेवा आणि संघटनबांधणीतून सार्थ ठरवू” — आदित्य घरत
उरण : प्रतिनिधी | दि. १० सप्टेंबर
उरण तालुका काँग्रेस कमिटीच्या उपाध्यक्षपदी काँग्रेसचे कार्यकर्ते व कामगार नेते महेंद्रशेठ घरत यांचे विश्वासू सहकारी आदित्य यशवंत घरत यांची निवड करण्यात आली आहे. महाराष्ट्र प्रदेश काँग्रेसचे प्रदेशाध्यक्ष हर्षवर्धन सपकाळ तसेच काँग्रेसचे ज्येष्ठ नेते महेंद्रशेठ घरत यांच्या हस्ते आदित्य घरत यांना नियुक्तीपत्र देण्यात आले.
निवडीनंतर आदित्य घरत यांनी महाराष्ट्र प्रदेश काँग्रेसचे प्रदेशाध्यक्ष हर्षवर्धन सपकाळ, ज्येष्ठ नेते महेंद्रशेठ घरत तसेच पक्षातील सर्व वरिष्ठ पदाधिकाऱ्यांचे आभार मानले. ही निवड केवळ पदाची जबाबदारी नसून काँग्रेस पक्षाची विचारधारा, लोकशाही मूल्ये आणि सर्वसामान्य जनतेच्या हक्कांसाठी अधिक जोमाने कार्य करण्याची प्रेरणा असल्याची भावना त्यांनी व्यक्त केली.
उरण तालुक्यात काँग्रेस पक्षाची संघटना अधिक मजबूत करण्यासाठी तसेच जनतेच्या विविध प्रश्नांना प्रभावीपणे वाचा फोडण्यासाठी सातत्याने कार्यरत राहणार असल्याचे आदित्य घरत यांनी सांगितले. समाजातील प्रत्येक घटकाला न्याय मिळवून देण्यासाठी निष्ठेने व प्रामाणिकपणे काम करण्याचा निर्धारही त्यांनी व्यक्त केला.
“माझ्यावर दाखविलेला विश्वास जनसेवा, संघटनबांधणी आणि लोकहिताच्या कार्यातून सार्थ ठरविण्याचा मी प्रामाणिक प्रयत्न करेन. पक्षाचे वरिष्ठ नेते, कार्यकर्ते आणि जनतेचे मार्गदर्शन व साथ हीच माझी खरी ताकद आहे,” असा विश्वास आदित्य यशवंत घरत यांनी व्यक्त केला.
आदित्य घरत यांनी यापूर्वी काँग्रेस पक्षाची ध्येयधोरणे तळागाळापर्यंत पोहोचविण्यासाठी सक्रियपणे काम केले असून पक्षाच्या संघटनात्मक कार्यात सातत्याने सहभाग घेतला आहे. त्यांच्या निवडीमुळे उरण तालुका काँग्रेसमधील कार्यकर्त्यांमध्ये उत्साहाचे वातावरण निर्माण झाले असून, विविध स्तरांतून त्यांचे अभिनंदन व शुभेच्छा व्यक्त होत आहेत.
