बालगोपालांसाठी विविध स्पर्धांचे आयोजन; विजेत्यांना आकर्षक रोख बक्षिसांसह प्रत्येक स्पर्धकाला भेटवस्तू
चामोर्शी : प्रतिनिधी
चामोर्शी शहरात बालगोपालांसाठी सांस्कृतिक वारसा जपण्याच्या उद्देशाने शुक्रवार, दि. ११ सप्टेंबर २०२६ रोजी दुपारी ४ वाजता भव्य ‘तान्हापोळा उत्सव’ आयोजित करण्यात आला आहे. हा सोहळा आठवडी बाजार चौक, नगरपंचायतसमोर, चामोर्शी येथे होणार आहे.
या उत्सवाचे प्रमुख आकर्षण ‘चामोर्शी तालुक्यातील प्रथम चामोर्शी रत्न पुरस्कार’ हे असणार आहे. यासोबतच बालकांसाठी वयोगटानुसार दोन विविध थीमवर स्पर्धांचे आयोजन करण्यात आले असून, विजेत्यांना आकर्षक रोख बक्षिसे दिली जाणार आहेत.
गट ‘अ’ : १ ते ६ वर्षे
या गटासाठी ‘गडचिरोली जिल्ह्यातील संस्कृती’ ही थीम ठेवण्यात आली आहे. प्रथम क्रमांकासाठी ₹६,००१, द्वितीय क्रमांकासाठी ₹५,००१ आणि तृतीय क्रमांकासाठी ₹२,५०१ अशी बक्षिसे देण्यात येणार आहेत. प्रथम बक्षीस किशोर ओल्लालवार, द्वितीय बक्षीस सोनाली पिपरे आणि तृतीय बक्षीस शुभम एंटरप्रायजेस, चामोर्शी यांच्या वतीने देण्यात येणार आहे.
गट ‘ब’ : ७ ते १४ वर्षे
या गटासाठी ‘रस्ते सुरक्षा’ ही थीम निश्चित करण्यात आली आहे. प्रथम क्रमांकासाठी ₹७,००१, द्वितीय क्रमांकासाठी ₹५,००१ आणि तृतीय क्रमांकासाठी ₹३,००१ अशी बक्षिसे देण्यात येणार आहेत. ही बक्षिसे अनुक्रमे रितेश पालारपवार, कविश्वरराव आईंचवार आणि सूरज प्रकाश शिवनीवार यांच्या वतीने देण्यात येणार आहेत.
याशिवाय सहभागी होणाऱ्या प्रत्येक बाल स्पर्धकाला राजा गोपिचंद किराणा यांच्या वतीने आकर्षक भेटवस्तू देण्यात येणार आहे. कार्यक्रम वेळेत सुरू करण्यात येणार असून, परीक्षकांचा निर्णय अंतिम राहणार असल्याचे आयोजकांनी स्पष्ट केले आहे.
सामाजिक कार्यकर्ते अमोल आईंचवार, नगरसेविका प्रेमाताई आईंचवार, रमेश अधिकारी, यशवंत त्रिकोडे आणि माधवी पेशट्टीवार हे या कार्यक्रमाचे आयोजक आहेत. चामोर्शी शहरातील नागरिकांनी आपल्या बालगोपालांना नंदीबैलासह या पारंपरिक सोहळ्यात मोठ्या संख्येने सहभागी करून घ्यावे, असे आवाहन आयोजकांनी केले आहे.
