लोणखेड्यात सर्वज्ञ श्रीचक्रधर स्वामी अवतार दिन महोत्सवानिमित्त भव्य रॅली उत्साहात संपन्न.

शहादा,दि.12 (प्रतिनिधी)
जय श्रीकृष्ण महानुभाव परिषद, शहादा यांच्या संयुक्त विद्यमाने सर्वज्ञ श्रीचक्रधर स्वामी अवतार दिन महोत्सवाचे औचित्य साधून लोणखेडा ते पाटीदार मंगल कार्यालयादरम्यान भक्तिमय वातावरणात भव्य रॅलीचे आयोजन करण्यात आले होते.या सोहळ्यात पंचक्रोशीतील हजारो भाविकांनी मोठ्या उत्साहाने सहभाग नोंदवला.

लोणखेडा नगरीत रॅलीचे आगमन होताच स्थानिक ग्रामस्थ व भाविकांच्या वतीने अभूतपूर्व स्वागत करण्यात आले. ‘जय श्रीकृष्ण’ आणि सर्वज्ञ श्रीचक्रधर स्वामींच्या जयघोषाने संपूर्ण परिसर दुमदुमून गेला होता.स्वामींच्या पवित्र विचारांचा, अहिंसेचा आणि मानवतेचा संदेश जनमानसात पोहोचवणे हा या रॅलीचा मुख्य उद्देश होता.या मंगलमयी सोहळ्याला सर्वज्ञ आचार्य प्रवर श्री गुरुवर्य श्री मोघेबाबा (जाधववाडी) तसेच तत्त्वदर्शी वचन सर्विता आचार्य प्रवर श्री मोघेबाबा (शहादा) यांच्यासह परिसरातील अनेक संत-महंतांची वंदनीय उपस्थिती लाभली. संतांच्या हस्ते धर्मध्वजाचे पूजन करून रॅलीचा प्रारंभ करण्यात आला.कार्यक्रमास प्रमुख पाहुणे म्हणून परिसराचे नेते सातपुडा साखर कारखान्याचे अध्यक्ष दीपकभाई पाटील, भाजपाचे जिल्हा उपाध्यक्ष प्रा.मकरंद पाटील आणि उपनगराध्यक्ष सौ.माधवीताई मकरंद पाटील यांची विशेष उपस्थिती होती. उपस्थित मान्यवरांनी आणि संतांनी श्रीचक्रधर स्वामींच्या चरणी विनम्र अभिवादन करून त्यांच्या महान कार्याचे व तत्त्वज्ञानाचे स्मरण केले.

रॅलीचा मार्ग लोणखेडा येथून सुरू होऊन पाटीदार मंगल कार्यालय येथे समाप्त झाला. तेथे महाप्रसाद व धर्मसभेचे आयोजन करण्यात आले होते. संपूर्ण सोहळा अत्यंत भक्तिमय, शिस्तबद्ध आणि आनंददायी वातावरणात पार पडला. हा सोहळा यशस्वी करण्यासाठी जय श्रीकृष्ण महानुभाव परिषदेच्या सर्व पदाधिकाऱ्यांनी व कार्यकर्त्यांनी विशेष परिश्रम घेतले.