शिवशंभो दहीहंडी संघ बारामतीने पहिल्याच प्रयत्नात फोडली दहीहंडी; ₹१ लाख ११ हजार १११ व आमदार चषकाचे मानकरी
प्रतिनिधी:मळद (ता. दौंड) : दौंड तालुक्याचे आमदार राहुल दादा कुल यांच्या उपस्थितीत मळद येथे आमदार राहुल दादा कुल दहीहंडी चषक २०२६ मोठ्या उत्साहात व जल्लोषात साजरा करण्यात आला. दहीहंडी फोडण्यासाठी गोविंदांचा मोठा मेळा मळद येथे भरला होता. परिसरातील नागरिक, कार्यकर्ते, माता भगिनी तसेच तरुणाईने मोठ्या संख्येने उपस्थित राहत कार्यक्रमाचा आनंद लुटला.
दहीहंडी उत्सवाच्या निमित्ताने गोपाळांच्या थरारक मानवी मनोऱ्यांनी उपस्थितांची मने जिंकली. शिवशंभो दहीहंडी संघ, बारामती यांना दहीहंडी फोडण्याचा मान मिळाला. या संघाने पहिल्याच प्रयत्नात दहीहंडी फोडत विजेतेपद पटकावले. विजेत्या संघाला ₹१ लाख ११ हजार १११ रुपये रोख बक्षीस आणि ‘आमदार राहुल दादा कुल दहीहंडी चषक’ प्रदान करण्यात आला.
कार्यक्रमाचे आणखी एक प्रमुख आकर्षण म्हणजे प्रसिद्ध नृत्यांगना मयुरी उतेकर यांचा मराठी गाण्यांवरील नृत्याचा मनोरंजनात्मक कार्यक्रम. त्यांच्या नृत्याला उपस्थितांनी उत्स्फूर्त दाद देत कार्यक्रमाचा मनमुराद आनंद घेतला.
या भव्य दहीहंडी उत्सवाचे आयोजन दौंड तालुका भाजपा युवा मोर्चाचे अध्यक्ष ॲड. बापूराव भागवत, शिवराज उद्योग समूहाचे कालिदास रणवरे पाटील, तसेच न्यू किशोर इलेक्ट्रिकचे सर्वेसर्वा किशोर दादा नवले यांच्या पुढाकारातून करण्यात आले. आमदार राहुल दादा कुल यांचे कट्टर व खंदे समर्थक म्हणून ओळखले जाणारे आयोजक आणि त्यांच्या सहकाऱ्यांनी कार्यक्रम यशस्वी करण्यासाठी विशेष मेहनत घेतली.
दहीहंडीच्या आयोजनासाठी प्रत्येक कार्यकर्त्याने आपला जीव ओतून काम केले. कार्यक्रमात शिस्त, नियोजन आणि सुरक्षिततेला विशेष प्राधान्य देण्यात आले होते. विशेषतः महिलांच्या सुरक्षिततेची योग्य व्यवस्था करण्यात आल्याने मोठ्या संख्येने माता भगिनी व महिला कार्यक्रमाला उपस्थित राहिल्या. त्यामुळे महिला उपस्थिती लक्षणीय ठरली.
दहीहंडी कार्यक्रम म्हणजे सुरक्षितता आणि आनंदाचा संगम’, अशी भावना उपस्थित नागरिकांनी व्यक्त केली. सुरक्षित वातावरणात दहीहंडीचा थरार आणि मनोरंजनाचा मनमुराद आनंद घेता आल्याने ग्रामस्थांनी आयोजकांचे कौतुक केले.
या कार्यक्रमाला मळद गावातील ग्रामस्थ, महिला, युवक, कार्यकर्ते व परिसरातील नागरिकांनी मोठ्या संख्येने उपस्थित राहून दहीहंडी उत्सवाची रंगत वाढवली. उत्साह, जल्लोष, गोविंदांच्या घोषणांनी आणि मराठी गाण्यांवरील नृत्याने मळद परिसर अक्षरशः दुमदुमून गेला.
