प्रिय संजूभाऊ,
स.न.वि.वि.
विद्यालय म्हणजे केवळ वर्गखोल्या, फळा, पुस्तके आणि विद्यार्थी नव्हेत; तर तेथील प्रत्येक माणसाच्या योगदानातून विद्यालयाचे एक सुंदर कुटुंब तयार होत असते. या कुटुंबात काही व्यक्ती आपल्या पदामुळे नव्हे, तर आपल्या माणुसकीमुळे मोठ्या होतात. अशाच व्यक्तिमत्त्वांपैकी एक म्हणजे विद्यालयातील सहकारी, मार्गदर्शक, मित्र आणि सदैव मदतीसाठी तत्पर असलेले वरिष्ठ लिपिक श्री. संजय वराडे जी.
संजय वराडे हे नाव घेताच डोळ्यांसमोर येते ते एक हुशार, संयमी, आपुलकीचे आणि अजातशत्रू व्यक्तिमत्त्व. कोणाशीही कटुता नाही, कुणाविषयी द्वेष नाही आणि आपल्या शब्दांनी किंवा वागण्याने कुणाचे मन दुखावू नये, याची सदैव जाणीव ठेवणारा माणूस. म्हणूनच आपल्या सहवासात आलेल्या प्रत्येकाच्या मनात आपल्याविषयी आदर आणि जिव्हाळा निर्माण होतो.
विद्यालयीन कामकाजात वरिष्ठ लिपिक म्हणून आपली भूमिका अत्यंत महत्त्वाची आहे. कागदपत्रे, कार्यालयीन प्रक्रिया, नोंदी आणि विविध प्रशासकीय जबाबदाऱ्या सांभाळताना आपला अनुभव, शिस्त आणि कामातील बारकावे समजून घेण्याची वृत्ती नेहमीच जाणवते. मात्र आपल्या व्यक्तिमत्त्वाची खरी ओळख केवळ पदात नाही; ती आहे माणूस म्हणून असलेल्या मोठेपणात.
काही प्रशासनिक व तांत्रिक कारणांमुळे जरी आपण आमच्या विद्यालयातून तात्पुरत्या कालावधीकरिता दूर गेले असलात, तरी आपण अजूनही सदैव आमच्यासोबतच आहात. अडचण कोणाचीही असो, काम कोणतेही असो किंवा मदतीची गरज कुणालाही भासो,
“काय अडचण आहे? पाहूया..सब ठीक हो जाएगा ”
अशा आपुलकीच्या शब्दांनी धीर देणारा माणूस म्हणजे संजय वराडे.
आपल्या मदतीला कधी औपचारिकतेची चौकट नसते आणि उपकाराची जाणीव करून देण्याची सवयही नाही. मदत करणे हा आपल्यासाठी उपकार नसून माणुसकीचा सहज स्वभाव आहे. म्हणूनच आपल्यासोबत काम करताना सहकाऱ्याला एक वेगळाच विश्वास वाटतो की, आपल्या अडचणीच्या वेळी कुणीतरी आपल्यासोबत उभे आहे.
आपण आमच्याकरिता केवळ विद्यालयातील सहकारी नाहीत, तर मार्गदर्शक आहात, विश्वासू मित्र आहात आणि सुख-दुःखात मनमोकळेपणाने संवाद साधता येईल अशी आपली माणूसकीची व्यक्ती आहात. आपल्या अनुभवातून मिळणारे मार्गदर्शन अनेकदा एखाद्या मोठ्या पुस्तकापेक्षा अधिक मोलाचे वाटते; कारण त्यामागे असतो तो अनुभवाचा गंध आणि आपुलकीची ऊब.
आपल्या व्यक्तिमत्त्वाची आणखी एक सुंदर बाजू म्हणजे अजातशत्रुत्व. प्रत्येकाशी जुळवून घेणे, मतभेदांना मनभेद होऊ न देणे आणि नात्यांमध्ये गोडवा जपणे ही कला प्रत्येकाला जमत नाही. पण आपण ती आपल्या स्वभावातून सहज आत्मसात केली आहे.
आपल्या सहवासात आल्यावर जाणवते की, माणसं जिंकण्यासाठी मोठमोठ्या गोष्टींची गरज नसते; मन स्वच्छ आणि वागणं निर्मळ असलं की माणसं आपोआप जोडली जातात.
संजय नावातच जणू विजयाचा स्पर्श आहे; पण आपल्या आयुष्यातील खरा विजय हा पद, प्रतिष्ठा किंवा संपत्तीचा नसून आपण जपलेल्या माणसांच्या नात्यांचा आहे.आपल्या भोवती असलेली माणसं हीच आपल्या आयुष्याची खरी कमाई आहे.
आज आपल्या वाढदिवसानिमित्त शुभेच्छा देताना मनापासून एकच वाटते,
आपल्या आयुष्यात काही माणसं अशी असतात की, त्यांच्या उपस्थितीनेच वातावरणात विश्वास, आधार आणि आपलेपणा निर्माण होतो. श्री. संजय वराडे हे त्यापैकीच एक.
ईश्वरचरणी प्रार्थना की, आपल्या आयुष्यातील प्रत्येक दिवस आनंदाने उजळून निघो. उत्तम आरोग्य, दीर्घायुष्य, सुख-समाधान आणि यश लाभो.आपल्या चेहऱ्यावरचे हास्य असेच कायम राहो आणि आपल्या हातून माणुसकीची सेवा अशीच घडत राहो.
आपण सहकारी म्हणून लाभलात,
मार्गदर्शक म्हणून लाभलात,
मित्र म्हणून लाभलात—
ही आमच्यासाठी नक्कीच आनंदाची आणि अभिमानाची बाब आहे.
🎂 वाढदिवसाच्या हार्दिक शुभेच्छा, संजय सर! 💐
आपला सहवास असाच लाभत राहो आणि मैत्रीच्या या सुंदर नात्याला काळाची कोणतीही सीमा पडू नये, हीच मनापासून सदिच्छा!
आपला सहकारी व मित्र,
श्री. मयूर भोंबे
(एम.ए.मराठी ; बी.एड्)
माध्य.शिक्षक, ग्रा.वि.वि.सालवा
9881529204
mayurbhombe@gmail.com
