जळगाव – जळगाव जिल्हा पोलीस दलातर्फे पोलीस पाटील मेळावा व ‘विश्वासाची लेन्स’ छायाचित्र आणि Reels स्पर्धेचा बक्षीस वितरण समारंभ उत्साहात संपन्न झाला.
ग्रामीण भागात पोलीस प्रशासन आणि नागरिकांमधील महत्त्वाचा दुवा म्हणून पोलीस पाटील यांची भूमिका अत्यंत महत्त्वपूर्ण आहे. गावपातळीवर कायदा व सुव्यवस्था राखणे, गुन्हेगारीला प्रतिबंध करणे तसेच विविध जनजागृती उपक्रम राबविण्यात पोलीस पाटील यांचे योगदान मोठे आहे. या योगदानाचा गौरव करण्यासाठी या मेळाव्याचे आयोजन करण्यात आले होते.
मेळाव्यात पोलीस पाटील यांना नवीन कायदे, कायदा व सुव्यवस्था तसेच त्यांचे कर्तव्य व जबाबदाऱ्यांबाबत सविस्तर मार्गदर्शन व प्रशिक्षण देण्यात आले. यावेळी ‘पोलीस पाटील मार्गदर्शक पुस्तिका’ चे मान्यवरांच्या हस्ते अनावरण करण्यात आले.
या कार्यक्रमास पाणीपुरवठा व स्वच्छता मंत्री तथा जळगाव जिल्ह्याचे पालकमंत्री मा. ना. श्री. गुलाबराव पाटील, जलसंपदा (विदर्भ, तापी व कोकण खोरे विकास महामंडळ) तथा आपत्ती व्यवस्थापन मंत्री मा. ना. श्री. गिरीश महाजन, वस्त्रोद्योग मंत्री मा. ना. श्री. संजय सावकारे, जळगाव विधानसभेचे आमदार मा. श्री. सुरेश भोळे, चाळीसगाव विधानसभेचे आमदार मा. श्री. मंगेश चव्हाण यांच्यासह जिल्हाधिकारी, जळगाव व पोलीस अधीक्षक, जळगाव यांची प्रमुख उपस्थिती होती.
यावेळी जळगाव जिल्ह्यात उत्कृष्ट व उल्लेखनीय कामगिरी करणाऱ्या ३७ पोलीस पाटील यांचा मान्यवरांच्या हस्ते सन्मानपत्र व बक्षीस देऊन गौरव करण्यात आला.
