दोन गंभीर रुग्णांना बोटीने नदी पार करून उपचारासाठी अहेरीला रवाना; ६३ गावांचा संपर्क तुटला
प्रतिनिधी :
दि. २५ सप्टेंबर २०२६
भामरागड : पर्लकोटा नदीच्या पाणीपातळीत मोठी वाढ झाल्याने नदीचे पाणी पुलावरून वाहू लागले आहे. परिणामी भामरागड–आलापल्ली मार्गावरील वाहतूक ठप्प झाली असून, पुराच्या पाण्यामुळे भामरागड तालुक्यातील तब्बल ६३ गावांचा संपर्क तुटला आहे. या पार्श्वभूमीवर प्रशासनाकडून पूरस्थितीवर बारकाईने लक्ष ठेवण्यात येत आहे.
दरम्यान, पुराच्या गंभीर परिस्थितीत भामरागड येथील दोन गंभीर रुग्णांना तातडीने पुढील उपचारासाठी हलविण्याची आवश्यकता निर्माण झाली. वाहतूक मार्ग बंद असतानाही राज्य आपत्ती प्रतिसाद दलाच्या (एसडीआरएफ) पथकाने तत्परता दाखवत दोन्ही रुग्णांना बोटीच्या साहाय्याने पर्लकोटा नदी पार करून हेमलकसा येथे सुरक्षितपणे पोहोचविले.
यानंतर हेमलकसा येथून रुग्णवाहिकेच्या माध्यमातून दोन्ही रुग्णांना पुढील उपचारासाठी अहेरी येथील उपजिल्हा रुग्णालयाकडे रवाना करण्यात आले. पुरामुळे वाहतूक व्यवस्था विस्कळीत झालेली असतानाही रुग्णांना वेळेत उपचार मिळणे आवश्यक होते. अशा प्रतिकूल परिस्थितीत एसडीआरएफच्या पथकाने केलेल्या मदतीमुळे दोन्ही गंभीर रुग्णांना सुरक्षितपणे पुढील उपचारासाठी हलविणे शक्य झाले.
दरम्यान, पर्लकोटा नदीच्या पुरामुळे भामरागड तालुक्यातील ६३ गावांचा संपर्क तुटल्याने नागरिकांमध्ये चिंता निर्माण झाली आहे. पूरस्थिती लक्षात घेता नागरिकांनी नदी, नाले तसेच पुराच्या पाण्यातून प्रवास करू नये, असे आवाहन प्रशासनाकडून करण्यात आले आहे.
