सात गावांतील प्रस्तावित खननकामांना संवैधानिक विरोध; पारंपरिक महाग्रामसभेची भूमिका
प्रतिनिधी :
दि. २५ सप्टेंबर २०२६
गडचिरोली : एटापल्ली तालुक्यातील पारंपरिक महाग्रामसभा इलाका सुरजागड अंतर्गत येणाऱ्या विविध गावांतील समस्यांकडे प्रशासनाचे लक्ष वेधण्यासाठी जिल्हाधिकारी, गडचिरोली यांना निवेदन सादर करण्यात आले. सुरजागड इलाक्यातील ७० गावांपैकी मौजा वेदमगड, नैनवाडी, वाटेली, जेवेली, मोस्डके, पुस्के आणि दमकोंदवाही या सात गावांतील प्रस्तावित खननकामांना संवैधानिक विरोध दर्शवून संबंधित खननकामे रद्द करण्याची मागणी निवेदनातून करण्यात आली.
सुरजागड इलाक्यातील सात गावांशी संबंधित खननविषयक समस्या तातडीने सोडविण्यात याव्यात, अशी मागणी यावेळी करण्यात आली. तसेच स्थानिक ग्रामसभांना कोणत्याही प्रकारची दिशाभूल न करता त्यांच्या संवैधानिक अधिकारांची योग्य अंमलबजावणी करण्याची संधी देण्यात यावी, अशी भूमिकाही पारंपरिक महाग्रामसभेच्या पदाधिकाऱ्यांनी मांडली.
यावेळी पारंपरिक महाग्रामसभा इलाका सुरजागडच्या अध्यक्ष सौ. कल्पना आलाम, उपाध्यक्ष बंडू दोरपेटी, सचिव देवू हिचामी, जिल्हा महाग्रामसभा सदस्य पत्तू पोटावी, सदस्य लक्ष्मण जेट्टी, जिल्हा महाग्रामसभा सदस्य सौ. पूनम जेट्टी, इलाका महाग्रामसभा सल्लागार सम्मा जेट्टी, सदस्य रामलू गोटा व शंकर नवडी यांच्यासह पदाधिकारी व सदस्य उपस्थित होते.
सुरजागड इलाक्यातील ग्रामसभा व स्थानिक नागरिकांच्या संवैधानिक अधिकारांच्या संरक्षणासाठी एकजुटीने प्रयत्न करण्याचा निर्धार यावेळी व्यक्त करण्यात आला. संबंधित समस्यांकडे प्रशासनाने गांभीर्याने लक्ष देऊन तातडीने आवश्यक कार्यवाही करावी, अशी मागणी निवेदनाद्वारे करण्यात आली.
