शिक्षण क्षेत्रातील उल्लेखनीय कार्याची दखल; शिक्षक व शिक्षकेत्तर कर्मचारी सहकारी पतसंस्थेच्या वतीने गौरव
नागपूर : प्रतिनिधी : शिक्षक व शिक्षकेत्तर कर्मचारी सहकारी पतसंस्था मर्यादित, नागपूर यांच्या वतीने आयोजित छत्तीसाव्या वार्षिक आमसभेच्या प्रसंगी ग्रामीण विकास विद्यालय, सालवा येथील ज्येष्ठ शिक्षक राजेश माणिकराव ढोके यांचा विशेष सत्कार करण्यात आला.
नागपूर सुधार प्रन्यास कर्मचारी वेल्फेअर असोसिएशन सांस्कृतिक सभागृह, प्लॉट क्र. ८६-६१, ग्रेट नाग रोड, गणेशनगर, नागपूर येथे २७ सप्टेंबर रोजी आमसभेचे आयोजन करण्यात आले होते. यावेळी राजेश ढोके यांना ८ सप्टेंबर रोजी नाशिक येथे दर्पणकार बाळशास्त्री जांभेकर पत्रकार संघाच्या वतीने प्रदान करण्यात आलेल्या ज्ञानभास्कर पुरस्काराबद्दल गौरविण्यात आले.
शैक्षणिक क्षेत्रातील उल्लेखनीय कार्याची दखल घेत मिळालेल्या या पुरस्काराच्या प्रीत्यर्थ पतसंस्थेच्या वतीने ढोके यांचा विशेष सन्मान करण्यात आला. त्यांच्या या कामगिरीबद्दल उपस्थितांनी अभिनंदन करून पुढील कार्यासाठी शुभेच्छा दिल्या.
या सत्कार समारंभास संस्थेचे अध्यक्ष विशालजी बंड, उपाध्यक्ष विजय भांगे, सचिव बाळनाथ मानकर आणि सहसचिव अतुल टेकाडे यांची प्रमुख उपस्थिती होती. तसेच संस्थेचे संचालक मंडळ, मान्यवर पदाधिकारी आणि शिक्षक सभासद मोठ्या संख्येने उपस्थित होते.
मान्यवरांच्या उपस्थितीत आणि उत्साहपूर्ण वातावरणात हा विशेष सत्कार सोहळा उत्साहात पार पडला.
