कृषिभूषण पुरस्कारांनी शेतकऱ्यांचा गौरव; केडगाव उपबाजारातील कांदा व डाळिंब शेडचे भूमिपूजन
मळद (दौंड) : प्रतिनिधी — कृषी उत्पन्न बाजार समिती, दौंड यांच्या वतीने २३ वी वार्षिक सर्वसाधारण सभा, भव्य शेतकरी मेळावा तसेच लोकनेते स्व. सुभाषआण्णा कुल कृषिभूषण पुरस्कार वितरण सोहळा २०२५-२६ उत्साहात पार पडला. यावेळी केडगाव उपबाजार समितीतील कांदा शेड व डाळिंब शेडच्या भूमिपूजन सोहळ्याचेही आयोजन करण्यात आले.
दौंड विधानसभा मतदारसंघाचे आमदार राहुलदादा कुल यांच्या हस्ते विविध क्षेत्रांत उल्लेखनीय कामगिरी करणाऱ्या शेतकऱ्यांना लोकनेते स्व. सुभाषआण्णा कुल कृषिभूषण पुरस्कार प्रदान करून गौरविण्यात आले. पुरस्कारामुळे शेतकरी बांधवांमध्ये उत्साहाचे वातावरण निर्माण झाले.
यावेळी बाजार समितीच्या माध्यमातून शेतकऱ्यांना उपलब्ध करून देण्यात येणाऱ्या विविध सुविधा, शेतीमालाच्या बाजारपेठेतील व्यवस्थापन तसेच शेतकरी हितासाठी राबविण्यात येणाऱ्या उपक्रमांची माहिती देण्यात आली. केडगाव उपबाजारातील कांदा व डाळिंब शेडच्या उभारणीमुळे परिसरातील शेतकऱ्यांना शेतीमालाची हाताळणी, साठवणूक व विक्रीसाठी सुविधा उपलब्ध होणार आहेत.
कार्यक्रमास कृषी उत्पन्न बाजार समितीचे पदाधिकारी, संचालक मंडळ, अधिकारी-कर्मचारी, शेतकरी, व्यापारी तसेच परिसरातील नागरिक मोठ्या संख्येने उपस्थित होते. उत्साहपूर्ण वातावरणात कार्यक्रमाची सांगता झाली.
