श्री भैरवनाथ ग्रामविकास प्रतिष्ठानच्या सामाजिक उपक्रमाचे सर्व स्तरातून कौतुक
मळद (ता. दौंड) : प्रतिनिधी — श्री भैरवनाथ ग्रामविकास प्रतिष्ठान, मळदचे अध्यक्ष किशोर उर्फ दादा नवले यांच्या संकल्पनेतून तसेच उद्योजक अजय म्हेत्रे यांच्या सहकार्याने भैरवनाथ मंदिरासमोर भव्य आरोग्य शिबिराचे आयोजन करण्यात आले. शिबिराचे उद्घाटन मळदच्या सरपंच सौ. रूपाली चंद्रकांत दुधे यांच्या हस्ते करण्यात आले.
या शिबिरात तब्बल १८९ महिला व पुरुषांची आरोग्य तपासणी करण्यात आली. तपासणीनंतर आवश्यकतेनुसार रुग्णांना मोफत औषधांचे वाटप करण्यात आले. ग्रामीण भागातील नागरिकांना गावातच आरोग्य तपासणी व औषधोपचाराची सुविधा उपलब्ध झाल्याने ग्रामस्थांनी या उपक्रमाचे स्वागत केले. शिबिरासाठी हेल्प इंडिया संस्थेने सहकार्य केले.
श्री भैरवनाथ ग्रामविकास प्रतिष्ठानच्या माध्यमातून मळद गावात विविध सामाजिक उपक्रम राबविण्यात येत आहेत. काही दिवसांपूर्वी गावातील स्मशानभूमीची स्वच्छता मोहीम राबविण्यात आली होती. त्यानंतर नागरिकांच्या आरोग्याचा विचार करून आरोग्य शिबिराचे आयोजन करण्यात आले.
किशोर उर्फ दादा नवले यांनी ‘न्यू किशोर इलेक्ट्रिकल’ या व्यवसायाच्या माध्यमातून यशस्वी वाटचाल करताना सामाजिक कार्यालाही प्राधान्य दिले आहे. “गावासाठी अनेक योजना मनात आहेत. त्या टप्प्याटप्प्याने पूर्ण करण्याचा प्रयत्न असून, मळद गावाने महाराष्ट्रासह देशाच्या नकाशावर वेगळी ओळख निर्माण करावी, ही इच्छा आहे,” असे त्यांनी सांगितले.
आरोग्य शिबिरासह विविध सामाजिक उपक्रमांमुळे मळद गावात सकारात्मक वातावरण निर्माण झाले असून, श्री भैरवनाथ ग्रामविकास प्रतिष्ठानच्या कार्याचे ग्रामस्थांसह विविध स्तरांतून कौतुक होत आहे.
