परभणी/प्रतिनिधी :- रमेश मुलगीर
मानवत तालुक्यातील संभाव्य पाणीटंचाईच्या पार्श्वभूमीवर सार्वजनिक जलस्रोतामधून कोणीही अनधिकृत पाणी उपसा करू नये, असे आवाहन तहसीलदार संजय खिल्लारे यांनी केले आहे. या बाबत बोलताना तहसीलदार संजय खिल्लारे म्हणाले, “मानवत तालुक्यात उपलब्ध जलसाठा अपुरा आहे. त्यामुळे पिण्याच्या पाण्याचे काटेकोर नियोजन करणे गरजेचे आहे. सार्वजनिक जलस्रोतामधून अनधिकृत पाणी उपसा होणार नाही याकडे संबंधित विभागाने कटाक्षाने लक्ष ठेवावे. ग्रामीण भागासाठी पंचायत समिती व ग्रामपंचायत, शहरी भागासाठी नगरपालिका आणि तलावांसाठी पाटबंधारे विभागाने समन्वयाने काम करावे. अनधिकृत उपसा करणाऱ्यांवर कायदेशीर तरतुदीनुसार कठोर कारवाई केली जाईल. दरम्यान, आज तहसीलदार संजय खिल्लारे यांनी कर्मचाऱ्यां सह आंबेगाव तलावाची पाहणी केली. यावेळी अनधिकृत पाणी उपसा साधनांची तपासणी केली असता वीज वितरण कंपनीने यापूर्वीच तेथील पंपांचे विद्युत कनेक्शन तोडल्याचे लाईनमनने सांगितले. यावेळी पाटबंधारे विभागाचे कर्मचारी, मंडळाधिकारी रुपेश गौतम, तलाठी गोस्वामी, शेख आतीक व पोलीस पाटील उपस्थित होते.
