वाशिम | प्रतिनिधी राहुल राठोड
सध्या उन्हाचा तडाखा, पाण्याची कमतरता आणि दुष्काळसदृश परिस्थितीमुळे पशुपक्ष्यांना अन्न व पाण्यासाठी मोठी धडपड करावी लागत आहे. अशा परिस्थितीत निसर्गातील पशुपक्ष्यांचे संरक्षण व्हावे आणि त्यांनाही जगण्यासाठी आवश्यक सुविधा मिळाव्यात, या उदात्त हेतूने वाशिम येथील निसर्गरम्य पोलिस वसाहतीमध्ये निस्वार्थ सेवा ग्रुपच्या सदस्यांनी कौतुकास्पद उपक्रम राबविला आहे.
पोलिस वसाहतीतील विविध झाडांवर वास्तव्य करणाऱ्या पक्ष्यांसाठी ग्रुपचे सदस्य भूषण भाऊ कुऱ्हेकर, श्री. दीपक इंगळे (मेजर), रविभाऊ इरचे, व्यंकटेश भाऊ रावलेवाड आणि ज्ञानेश्वर भाऊ कुटे यांनी पुढाकार घेत परिसरातील झाडांवर पक्ष्यांसाठी अन्न, पिण्याचे पाणी तसेच घरट्यांची व्यवस्था केली. वाढत्या उष्णतेच्या काळात पक्ष्यांना पाण्यासाठी भटकंती करावी लागू नये, तसेच त्यांना सुरक्षित निवारा मिळावा, हा या उपक्रमामागील मुख्य उद्देश आहे.
दुष्काळाच्या परिस्थितीत पशुपक्ष्यांची काळजी घेणे ही काळाची गरज
दुष्काळ किंवा पाणीटंचाईचा परिणाम केवळ माणसांवरच होत नाही, तर निसर्गातील पशुपक्ष्यांनाही त्याचा मोठा फटका बसतो. तलाव, विहिरी, नाले आणि इतर नैसर्गिक जलस्रोतांमध्ये पाणी कमी झाल्याने पक्ष्यांना पिण्याच्या पाण्यासाठी दूरवर भटकावे लागते. झाडांची घटती संख्या आणि नैसर्गिक अधिवासातील बदल यामुळेही अनेक पक्ष्यांसमोर अन्न व निवाऱ्याचा प्रश्न निर्माण होतो. अशा वेळी झाडांवर पाण्याची भांडी ठेवणे, धान्य उपलब्ध करून देणे आणि सुरक्षित घरट्यांची व्यवस्था करणे यांसारखे छोटे प्रयत्न पक्ष्यांसाठी उपयुक्त ठरू शकतात.
