वाघिरे महाविद्यालयाच्या विद्यार्थिनीचा गौरव; तुर्कीतील जागतिक स्पर्धेसाठी भारतीय संघात निवड
सासवड / पुणे : सासवड येथील वाघिरे कला, वाणिज्य व विज्ञान महाविद्यालयाची विद्यार्थिनी आणि आंतरराष्ट्रीय पॉवरलिफ्टर प्रतिभा अरुण लोणे हिला अशोक विजयादशमी व धम्मचक्र प्रवर्तन दिनाचे औचित्य साधून प्रतिष्ठेचा ‘चक्रवर्ती सम्राट अशोक राज्य क्रीडारत्न पुरस्कार’ प्रदान करण्यात आला. संजीवनी एज्युकेशनल, कल्चरल अँड स्पोर्ट्स रिसर्च फाउंडेशनच्या वतीने आंबेडकरनगर, कोंढवा बुद्रुक येथे आयोजित विशेष समारंभात तिचा गौरव करण्यात आला.
या सोहळ्यात प्रतिभा लोणे हिला सन्मानचिन्ह, मानपत्र, २० हजार रुपयांचा धनादेश, पॅट्रिक ऑलिवेल लिखित ‘सम्राट अशोक’ या पुस्तकाची प्रत, शाल, श्रीफळ आणि पुष्पगुच्छ देऊन सन्मानित करण्यात आले. यावेळी संजीवनी फाउंडेशनचे अध्यक्ष अमित जगताप, सचिव तथा पुणे महानगरपालिकेच्या नगरसेविका अर्चना जगताप, खजिनदार अश्विनी सरवदे, सहसचिव प्रा. श्रीकृष्ण थेटे, अक्षय भांडे, दीपक सोनवणे आणि वैभव रणदिवे उपस्थित होते.
खेळाडूंनी सम्राट अशोकांचा आदर्श घ्यावा : अमित जगताप
समारंभात बोलताना फाउंडेशनचे अध्यक्ष अमित जगताप म्हणाले की, खेळाडूंनी सम्राट अशोकांचा आदर्श डोळ्यांसमोर ठेवून जागतिक स्तरावर यश संपादन करावे. वाघिरे महाविद्यालयाची विद्यार्थिनी प्रतिभा लोणे हिने खडतर परिस्थितीवर मात करून जागतिक पॉवरलिफ्टिंग क्षेत्रात उल्लेखनीय स्थान मिळवले आहे. अशा गुणवंत खेळाडूंच्या पाठीशी केंद्र व राज्य शासनासह संपूर्ण समाजाने भक्कमपणे उभे राहणे आवश्यक असल्याचेही त्यांनी नमूद केले.
राष्ट्रीय स्पर्धेत तीन सुवर्ण आणि एका रौप्य पदकाची कमाई
वाघिरे महाविद्यालयात एम.ए. प्रथम वर्षात शिक्षण घेणाऱ्या प्रतिभा लोणे हिने उत्तर प्रदेशातील गाझीपूर येथे झालेल्या ओपन सीनियर नॅशनल पॉवरलिफ्टिंग चॅम्पियनशिपमध्ये तीन सुवर्णपदके आणि एक रौप्यपदक पटकावून सर्वसाधारण विजेतेपद मिळवले. या दमदार कामगिरीच्या जोरावर तिची नोव्हेंबर २०२६ मध्ये इस्तंबूल, तुर्की येथे होणाऱ्या ‘वर्ल्ड ओपन इक्विप्ड चॅम्पियनशिप २०२६’ या जागतिक स्पर्धेसाठी भारतीय संघात निवड झाली आहे.
प्रतिभाच्या या यशाबद्दल वाघिरे महाविद्यालयाचे प्राचार्य डॉ. तुषार शितोळे, उपप्राचार्य डॉ. बी. यू. माने, डॉ. संजय झगडे, विज्ञान विभागाचे समन्वयक प्रा. सचिन कुमार शहा, वाणिज्य विभागाचे समन्वयक डॉ. नरसिंग गिरी, कार्यालयीन अधीक्षक रवींद्र जाधव आणि क्रीडा संचालक प्रा. प्रितम ओव्हाळ यांच्यासह महाविद्यालयातील प्राध्यापक व कर्मचाऱ्यांनी तिचे अभिनंदन केले.
या पुरस्कारामुळे प्रतिभा लोणे हिच्या क्रीडा कारकिर्दीला नवी प्रेरणा मिळाली असून, आगामी जागतिक स्पर्धेत ती भारताचे प्रतिनिधित्व करणार असल्याने तिच्या यशाकडे क्रीडाप्रेमींचे लक्ष लागले आहे. या समारंभाला क्रीडा क्षेत्रातील मान्यवर, महाविद्यालयाचे प्राध्यापक आणि नागरिक मोठ्या संख्येने उपस्थित होते.
