महाराजा जिवाजीराव शिंदे महाविद्यालयाच्या ॲथलेटिक्स खेळाडूंची चमकदार कामगिरी

सविता वाळके व सुरेखा मातने यांना दुहेरी यश; मुला-मुलींच्या रिले संघांचीही पदकांना गवसणी

श्रीगोंदा | प्रतिनिधी

श्रीरामपूर येथे १८ व १९ ऑक्टोबर २०२६ रोजी झालेल्या आंतरमहाविद्यालयीन ॲथलेटिक्स स्पर्धेत श्रीगोंदा येथील महाराजा जिवाजीराव शिंदे महाविद्यालयाच्या खेळाडूंनी उल्लेखनीय कामगिरी केली. विविध क्रीडा प्रकारांत प्रथम, द्वितीय आणि तृतीय क्रमांक मिळवत महाविद्यालयाच्या खेळाडूंनी आपल्या कौशल्याची छाप पाडली. त्यांच्या या यशाबद्दल सावित्रीबाई फुले पुणे विद्यापीठासह श्रीगोंदा परिसरातून अभिनंदन होत आहे.

या स्पर्धेत सविता वाळके हिने भालाफेक आणि गोळाफेक या दोन्ही प्रकारांत प्रथम क्रमांक पटकावला. सुरेखा मातने हिने १०,००० मीटर धावण्याच्या स्पर्धेत प्रथम क्रमांक मिळवून यश संपादन केले. रिद्धी सप्रे हिने ८०० मीटर धावण्याच्या स्पर्धेत द्वितीय क्रमांक मिळवला.

मुलींच्या ४×४०० मीटर रिले संघाने तृतीय क्रमांक पटकावला. या संघात समृद्धी सुद्रिक, सुरेखा मातने, रिद्धी सप्रे आणि सविता वाळके यांनी उत्कृष्ट कामगिरी केली.

मुलांच्या रिले संघानेही स्पर्धेत उल्लेखनीय यश मिळवले. ४×१०० मीटर रिले प्रकारात संघाने द्वितीय, तर ४×४०० मीटर रिले प्रकारात तृतीय क्रमांक प्राप्त केला. या संघात तेजस काळे, कृष्णा वायकर, रोहन चव्हाण आणि ऋषिकेश मांडगे यांनी उत्कृष्ट कामगिरी केली.

या यशस्वी खेळाडूंना महाविद्यालयाच्या शारीरिक शिक्षण संचालिका प्रा. कल्पना बागुल आणि क्रीडा शिक्षक संजय डफळ यांचे मार्गदर्शन लाभले.

खेळाडूंच्या यशाबद्दल महाविद्यालयीन विकास समितीचे अध्यक्ष तथा माजी मंत्री बबनराव पाचपुते, रयत शिक्षण संस्थेच्या मॅनेजिंग कौन्सिलचे सदस्य बाबासाहेब भोस, महाविद्यालय विकास समितीचे सदस्य तथा माजी आमदार राहुल जगताप, महावीर पटवा, महाविद्यालयाचे प्राचार्य प्रो. डॉ. प्रकाश साळवे, उपप्राचार्य डॉ. सुदाम भुजबळ, उपप्राचार्य तथा जिमखाना विभागप्रमुख डॉ. नितीन थोरात, ज्युनिअर कॉलेजचे उपप्राचार्य प्रा. श्रीकांत थोरात, पर्यवेक्षक प्रा. रत्नाकर झिटे, डॉ. राजाराम कानडे, डॉ. राहुल गायकवाड, डॉ. अनिल ढवळे, प्रा. संजय फटे तसेच सर्व प्राध्यापक आणि शिक्षकेतर कर्मचाऱ्यांनी अभिनंदन केले. तसेच खेळाडूंना पुढील वाटचालीसाठी शुभेच्छा दिल्या.

महाविद्यालयाच्या खेळाडूंनी मिळवलेल्या या यशामुळे क्रीडा क्षेत्रातील महाविद्यालयाची कामगिरी अधिक उजळली असून, त्यांच्या पुढील यशाबद्दल अपेक्षा व्यक्त होत आहेत.