श्री स्वामी समर्थ क्लिनिकचा उपक्रम; विविध आजारांच्या तपासण्यांसह आरोग्यविषयक मार्गदर्शन
बारामती प्रतिनिधी
बारामती : पिंपळी येथील श्री स्वामी समर्थ क्लिनिकच्या वतीने पिंपळी-लिमटेक परिसरातील नागरिकांसाठी मोफत सर्वरोग निदान शिबिराचे आयोजन करण्यात आले. या शिबिरात एकूण ७७ महिला व नागरिकांची आरोग्य तपासणी करण्यात आली.
शिबिराचे उद्घाटन डॉ. निशिगंधा ठेंगल यांचे वडील दिलीप ठेंगल आणि आई राणी ठेंगल यांच्या हस्ते भगवान धन्वंतरी यांच्या प्रतिमेचे पूजन करून करण्यात आले.
या शिबिरात डॉ. निशिगंधा ठेंगल (बीएचएमएस), डॉ. वर्षा घोरपडे (बीएचएमएस) आणि डॉ. दीपाली शिंदे (बीएएमएस) यांनी नागरिकांची तपासणी केली. शिबिराच्या आयोजनासाठी सहा नर्सिंग कर्मचाऱ्यांनी सहकार्य केले.
शिबिरात रक्तदाब, रक्तातील साखर, थायरॉईड, ईसीजी तसेच विविध रक्त तपासण्या करण्यात आल्या. याशिवाय किडनी, यकृत, पोटाचे विकार आणि महिलांच्या हिमोग्लोबिनच्या पातळीशी संबंधित तपासण्याही करण्यात आल्या. तपासणीनंतर डॉक्टरांनी नागरिकांना विविध आजारांपासून बचाव करण्यासाठी घ्यावयाची काळजी आणि संतुलित आहाराचे महत्त्व याविषयी मार्गदर्शन केले.
यावेळी किडनी आणि प्रोस्टेटच्या शस्त्रक्रिया लाईफ लाईन हॉस्पिटलच्या माध्यमातून मोफत करण्यात येणार असल्याची माहिती डॉक्टरांनी दिली.
या प्रसंगी माजी उपसरपंच अश्विनी बनसोडे, सामाजिक कार्यकर्ते हरिभाऊ केसकर, महाराष्ट्र प्रदेश राष्ट्रवादी काँग्रेस सोशल मीडिया विभागाचे उपाध्यक्ष सुनील बनसोडे, प्रसन्ना थोरात, समशेर इनामदार आणि राजेंद्र ठेंगल उपस्थित होते. परिसरातील नागरिक आणि महिलांनी या शिबिराला उत्स्फूर्त प्रतिसाद दिला.
