नीरा-बारामती राज्यमार्गावरील अपघात; अज्ञात वाहनचालकाविरुद्ध गुन्हा दाखल
सुनील निंबाळकर, बारामती प्रतिनिधी
वडगाव निंबाळकर : नीरा-बारामती राज्यमार्गावरील सोरटेवाडी गावच्या हद्दीत पवार वस्ती बसस्टॉपजवळ अज्ञात वाहनाने धडक दिल्याने पादचाऱ्याचा मृत्यू झाला. विकास सिताराम जगताप (वय ५४, रा. साळोबा वस्ती, मुरूम, ता. बारामती, जि. पुणे) असे मृत व्यक्तीचे नाव आहे. या प्रकरणी वडगाव निंबाळकर पोलिसांनी अज्ञात वाहनचालकाविरुद्ध गुन्हा दाखल केला आहे.
पोलिसांनी दिलेल्या माहितीनुसार, गुरुवारी (दि. २२ ऑक्टोबर २०२६) रात्री सुमारे ८.४६ वाजता विकास जगताप हे सोरटेवाडी हद्दीतील पवार वस्ती बसस्टॉपजवळ नीरा-बारामती राज्यमार्गावरून पायी जात होते. त्यावेळी करंजेपूल चौकाकडून वडगाव निंबाळकरच्या दिशेने जाणाऱ्या पांढऱ्या रंगाच्या अज्ञात वाहनाने त्यांना धडक दिली. या अपघातात त्यांच्या डोक्याला तसेच शरीराच्या इतर भागांना गंभीर दुखापत झाली.
जखमी जगताप यांना उपचारासाठी वाघळवाडी येथील साई सेवा मल्टी स्पेशालिटी हॉस्पिटलमध्ये दाखल करण्यात आले. मात्र, उपचार सुरू असताना रात्री ९.५८ वाजता डॉक्टरांनी त्यांना मृत घोषित केले.
या प्रकरणी वडगाव निंबाळकर पोलीस ठाण्यात गुन्हा रजिस्टर क्रमांक २२७/२०२६ अन्वये भारतीय न्याय संहिता कलम २८१, १२५(अ), १२५(ब), १०६(१) तसेच मोटार वाहन कायद्यातील संबंधित कलमांनुसार अज्ञात वाहनचालकाविरुद्ध गुन्हा दाखल करण्यात आला आहे.
अपघातानंतर वाहनचालक घटनास्थळावरून निघून गेल्याची माहिती पोलिसांनी दिली आहे. या प्रकरणाचा पुढील तपास ग्रेड पोलीस उपनिरीक्षक वारुळे करीत आहेत.
