नाल्यांची स्वच्छता आणि कीटकनाशक फवारणीचा अभाव असल्याचा ग्रामस्थांचा दावा; नागरिकांवर स्वतःच नाल्या साफ करण्याची वेळ
प्रतिनिधी
धारणी, दि. २४ ऑक्टोबर २०२६ : धारणी परिसरातील दिया ग्रामपंचायतीअंतर्गत येणाऱ्या तलाई गावात डेंग्यूचे तीन रुग्ण आढळल्याने नागरिकांमध्ये भीतीचे वातावरण निर्माण झाले आहे. गावात अस्वच्छता आणि डासांचा प्रादुर्भाव वाढण्याची शक्यता असताना ग्रामपंचायतीकडून नाल्यांची नियमित स्वच्छता, कीटकनाशक फवारणी आणि प्रतिबंधात्मक उपाययोजना केल्या जात नसल्याचा आरोप ग्रामस्थांनी केला आहे. त्यामुळे नागरिकांवर स्वतः पुढाकार घेऊन नाल्यांची सफाई करण्याची वेळ आल्याचे चित्र आहे.
गावातील नाल्यांमध्ये घाण साचल्याने परिसरात अस्वच्छता निर्माण झाली आहे. डेंग्यूचे तीन रुग्ण आढळल्यानंतरही स्वच्छतेच्या उपाययोजना प्रभावीपणे राबवल्या जात नसल्याने ग्रामस्थांमध्ये नाराजी व्यक्त होत आहे. डासांची उत्पत्ती रोखण्यासाठी साचलेल्या पाण्याची विल्हेवाट लावणे, नाल्यांची स्वच्छता करणे आणि आवश्यक ठिकाणी कीटकनाशक फवारणी करणे गरजेचे आहे. मात्र, या कामांकडे दुर्लक्ष होत असल्याचा आरोप नागरिकांकडून करण्यात येत आहे.
डेंग्यूचा संभाव्य प्रसार रोखण्यासाठी ग्रामपंचायत आणि आरोग्य विभागाने तातडीने लक्ष देण्याची गरज आहे. गावातील नाल्यांची स्वच्छता करावी, डास प्रतिबंधक उपाययोजना राबवाव्यात तसेच आरोग्य पथकामार्फत नागरिकांची तपासणी करून आवश्यक उपचार उपलब्ध करून द्यावेत, अशी मागणी ग्रामस्थांनी केली आहे.
डेंग्यूच्या रुग्णांमध्ये वाढ होण्यापूर्वीच प्रशासनाने प्रतिबंधात्मक उपाययोजना कराव्यात, अशी अपेक्षा नागरिक व्यक्त करत आहेत. तलाई गावातील स्वच्छतेचा प्रश्न सोडवण्यासाठी दिया ग्रामपंचायत आणि आरोग्य विभाग कोणती पावले उचलतात, याकडे ग्रामस्थांचे लक्ष लागले आहे.
