सासवड येथे एकनाथकाका जगताप प्रतिष्ठानचा नवदुर्गा पुरस्कार वितरण सोहळा; नऊ कर्तृत्ववान महिलांचा गौरव
पुरंदर / प्रतिनिधी :
समाजात वावरणाऱ्या प्रत्येक महिलेचा कायम सन्मान व्हायला हवा. महिलांमध्ये प्रचंड इच्छाशक्ती आणि कर्तृत्व असते; मात्र त्यांच्या इच्छाशक्तीला कुटुंबाची साथ मिळाली, तर त्या अधिक उंच भरारी घेऊ शकतात, असे प्रतिपादन नेवासा येथील स्वामी समर्थ साखर कारखान्याच्या कार्यकारी संचालक डॉ. ममता शिवतारे-लांडे यांनी केले.
सासवड येथील स्व. एकनाथकाका जगताप प्रतिष्ठानच्या वतीने आयोजित नवदुर्गा पुरस्कार वितरण सोहळ्यात त्या प्रमुख अतिथी म्हणून बोलत होत्या. यावेळी पुणे येथील परिवर्तन संस्थेचे समीर जाधवराव आणि सहाय्यक पोलीस निरीक्षक वैभव सोनवणे प्रमुख पाहुणे म्हणून उपस्थित होते.
प्रतिकूल परिस्थितीवर मात करून स्वतःच्या कर्तृत्वाने समाजात वेगळी ओळख निर्माण करणाऱ्या नऊ महिलांना यावेळी शाल, सन्मानपत्र आणि शफी पठाण लिखित ‘तुकाराम’ हे पुस्तक देऊन गौरविण्यात आले.
प्रतिकूल परिस्थितीवर मात करणाऱ्या महिलांचा गौरव
आपल्या मनोगतात डॉ. ममता शिवतारे यांनी प्रतिकूल परिस्थितीतून मार्ग काढत यश मिळविणाऱ्या महिलांचा सन्मान केल्याबद्दल प्रतिष्ठानचे कौतुक केले. तसेच सर्व पुरस्कारप्राप्त नवदुर्गांचे अभिनंदन केले. समीर जाधवराव आणि सहाय्यक पोलीस निरीक्षक वैभव सोनवणे यांनीही या उपक्रमाचे कौतुक करून पुरस्कारार्थींना पुढील वाटचालीसाठी शुभेच्छा दिल्या.
यावेळी डॉ. वृषाली जगताप, विजयमाला पवार, सीमा साळवे, स्नेहा धुमाळ, उज्वला बांदल, विद्या जाधव, पूजा गायकवाड, कल्पना जगताप आणि शालन कावडे या नऊ महिलांना त्यांच्या कार्यकर्तृत्वाबद्दल नवदुर्गा पुरस्कार देऊन सन्मानित करण्यात आले.
पीएच.डी.धारक आणि राष्ट्रीय क्रिकेटपटूचाही विशेष सन्मान
या कार्यक्रमात इलेक्ट्रॉनिक्स अँड टेलिकम्युनिकेशन विषयात पीएच.डी. प्राप्त केल्याबद्दल अमृता निखिल जगताप-ताकवले यांचा, तर १९ वर्षांखालील राष्ट्रीय क्रिकेट संघात निवड झाल्याबद्दल श्रेया धुमाळ हिचा विशेष सन्मान करण्यात आला. डॉ. वृषाली जगताप आणि विद्या जाधव यांनी सत्काराला उत्तर देताना आपल्या भावना व्यक्त केल्या.
कार्यक्रमाचे प्रास्ताविक प्रतिष्ठानचे अध्यक्ष संतोष जगताप यांनी केले, तर सचिव हेमंत ताकवले यांनी आभार मानले. मोहिनी लोणकर यांनी सूत्रसंचालन केले. किशोरी पवार यांनी सन्मानपत्रांचे वाचन केले.
यावेळी नगरसेविका शिल्पा जगताप, दीपाली जगताप, अॅड. अण्णासाहेब खाडे, डॉ. दीपक जगताप, रमेश कानडे, गिरीश जगताप, संजय काटकर, संदीप देवकर, शिवहार लहाने, मिलिंद इनामके, अक्षरराज जगताप, अंकुर शिवरकर, संजय जाधव, राजाराम यादव, अनिता जाधव, मीरा कानडे, दत्ता भोंगळे, रोहित खवले, सुधीर गुरव यांच्यासह अनेक मान्यवर आणि पुरस्कारार्थींचे कुटुंबीय उपस्थित होते.
