पोलीस अधीक्षक तुषार दोशी यांच्या आदेशानुसार गुन्हे शोध पथकाची मोहीम; मोहोळ पोलीस ठाण्याच्या हद्दीतून आरोपीला पकडले
कडेगाव : सांगली जिल्ह्यातील पाहिजे आणि फरारी आरोपींचा शोध घेऊन त्यांना ताब्यात घेण्याच्या आदेशानुसार चिंचणी-वांगी पोलिसांच्या गुन्हे शोध पथकाने फसवणुकीच्या गुन्ह्यातील एका पाहिजे आरोपीला सोलापूर जिल्ह्यातून ताब्यात घेतले. पोलीस अधीक्षक तुषार दोशी, अपर पोलीस अधीक्षक कल्पना बारवकर आणि विटा उपविभागाचे उपविभागीय पोलीस अधिकारी सदाशिव शेलार यांच्या मार्गदर्शनाखाली ही कारवाई करण्यात आली.
चिंचणी-वांगी पोलीस ठाण्यात दाखल असलेल्या गुन्हा रजिस्टर क्रमांक ११४/२०२३ मधील भारतीय दंड विधान कलम ४२० अंतर्गत नोंद असलेल्या फसवणुकीच्या गुन्ह्यात मनोहर देविदास राठोड (रा. पांडुर्णा, ता. पुसद, जि. यवतमाळ) हा आरोपी पाहिजे होता. पोलिसांनी त्याचा शोध घेत सोलापूर जिल्ह्यातील मोहोळ पोलीस ठाण्याच्या हद्दीतून त्याला ताब्यात घेतले.
चिंचणी-वांगी पोलीस ठाण्याचे सहायक पोलीस निरीक्षक किशोरकुमार खाडे यांच्या मार्गदर्शनाखाली गुन्हे शोध पथकाने आरोपीचा शोध घेण्यासाठी मोहीम राबवली. तपासादरम्यान आरोपी मोहोळ पोलीस ठाण्याच्या हद्दीत असल्याची माहिती मिळाली. त्यानंतर पथकाने संबंधित ठिकाणी जाऊन त्याला ताब्यात घेतले.
या पथकाचा कारवाईत सहभाग
या कारवाईत पोलीस उपनिरीक्षक योगेश शेलार, पोलीस हवालदार विनायक सावळगे, पोलीस नाईक विक्रम कुंभार आणि पोलीस कॉन्स्टेबल प्रवीण मलमे यांनी सहभाग घेतला.
या गुन्ह्याचा पुढील तपास पोलीस हवालदार मनोज जाधव करीत आहेत.
