पोलीस भरतीची तयारी करणाऱ्या विद्यार्थ्यांना उद्धव ढवळे यांचे मार्गदर्शन; श्रीगोंद्यात ४०० मीटर धावपट्टी उपलब्ध करून देण्याचे आश्वासन
श्रीगोंदा : रयत शिक्षण संस्थेच्या महाराजा जिवाजीराव शिंदे महाविद्यालयात उपमुख्यमंत्री विद्यार्थी सहायता कक्ष व स्पर्धा परीक्षा केंद्र यांच्या संयुक्त विद्यमाने १६ ऑक्टोबर २०२६ रोजी ‘मिशन खाकी’ या उपक्रमाचे आयोजन करण्यात आले. पोलीस भरतीची तयारी करणाऱ्या विद्यार्थ्यांना मार्गदर्शन करणे आणि त्यांच्या अडचणी समजून घेणे हा या उपक्रमाचा उद्देश होता.
या कार्यक्रमात उपमुख्यमंत्री विद्यार्थी सहायता कक्षाचे समन्वयक उद्धव ढवळे यांनी विद्यार्थ्यांना मार्गदर्शन केले. पोलीस भरतीसाठी शारीरिक क्षमता आणि नियमित सराव यांचे महत्त्व त्यांनी अधोरेखित केले. तसेच श्रीगोंदा नगरपरिषदेच्या अंतर्गत विद्यार्थ्यांना सरावासाठी ४०० मीटरची धावपट्टी उपलब्ध करून देण्याचे आश्वासन त्यांनी दिले.
आगामी काळात गुजरात राज्याच्या धर्तीवर महाराष्ट्रातील पोलीस भरती प्रक्रियेत राज्य सरकार विविध बदल करत असल्याची माहितीही ढवळे यांनी दिली. त्यामुळे विद्यार्थ्यांनी भरती प्रक्रियेतील बदलांची माहिती घेऊन नियोजनबद्ध तयारी करावी, असे आवाहन करण्यात आले.
कार्यक्रमाच्या अध्यक्षस्थानी महाविद्यालयाचे प्राचार्य डॉ. पी. एन. साळवे होते. स्पर्धा परीक्षा विभागाचे प्रमुख प्रा. अनिल ढवळे यांनी प्रास्ताविक केले. उपप्राचार्य प्रा. श्रीकांत थोरात यांनी विद्यार्थ्यांना मार्गदर्शन केले.
यावेळी प्रा. संजय फटे यांनी पोलीस भरतीची तयारी करणाऱ्या विद्यार्थ्यांना भेडसावणाऱ्या अडचणी मांडल्या. प्रा. संदीप दरेकर यांनी विद्यार्थ्यांशी संवाद साधून त्यांच्या प्रश्नांवर चर्चा केली. कार्यक्रमाच्या शेवटी प्रा. विजय मगर यांनी आभार मानले.
‘मिशन खाकी’ उपक्रमामुळे पोलीस भरतीची तयारी करणाऱ्या विद्यार्थ्यांना मार्गदर्शन मिळाले असून, सरावासाठी धावपट्टी उपलब्ध करून देण्याच्या आश्वासनामुळे विद्यार्थ्यांमध्ये आशा निर्माण झाली आहे.
