जेके हेरिटेज परिसरातील नागरिक त्रस्त; लहान मुलांना खोकला व खाशीचा त्रास होत असल्याची तक्रार, धूळ नियंत्रणासाठी तातडीच्या उपाययोजनांची मागणी
वसई पूर्व, मधुबन (प्रतिनिधी) : वसई पूर्वेतील मधुबन परिसरात जेके हेरिटेज सोसायटीच्या मुख्य रस्त्यालगत तसेच आजूबाजूच्या भागात सुरू असलेल्या बांधकामांमुळे मोठ्या प्रमाणात धूळ साचत आहे. वाहनांची सततची वर्दळ सुरू असल्याने ही धूळ हवेत पसरत असून, परिसरातील नागरिकांना त्रास सहन करावा लागत आहे.
रस्त्यावर साचलेली धूळ वाहनांच्या ये-जा करताना हवेत उडत असल्याने नागरिकांना श्वास घेण्यास त्रास होत असल्याच्या तक्रारी आहेत. विशेषतः लहान मुलांना खोकला व खाशीचा त्रास जाणवत असल्याचे स्थानिक नागरिकांचे म्हणणे आहे. त्यामुळे पालकांमध्ये चिंतेचे वातावरण असून, परिसरातील धुळीच्या समस्येकडे तातडीने लक्ष देण्याची गरज व्यक्त केली जात आहे.
बांधकामांच्या ठिकाणी धूळ नियंत्रणासाठी आवश्यक उपाययोजना केल्या जात आहेत का, असा प्रश्नही नागरिक उपस्थित करत आहेत. बांधकाम साहित्याची योग्य हाताळणी करणे, रस्त्यावर नियमित पाणी फवारणी करणे आणि धूळ हवेत पसरण्यापासून रोखण्यासाठी आवश्यक प्रतिबंधात्मक उपाययोजना करणे गरजेचे आहे.
संबंधित बांधकाम व्यावसायिक आणि प्रशासनाने या समस्येची गांभीर्याने दखल घेऊन धूळ नियंत्रणासाठी तातडीने उपाययोजना कराव्यात, अशी मागणी जेके हेरिटेज परिसरातील नागरिकांकडून होत आहे.
दरम्यान, प्रशासन या समस्येकडे लक्ष देऊन नागरिकांना धुळीच्या त्रासातून दिलासा देणार का, याकडे परिसरातील रहिवाशांचे लक्ष लागले आहे.
– धनंजय माळी, वसई प्रतिनिधी
