जलाशयाच्या कामामुळे पाणीपुरवठ्याच्या गुणवत्तेवर परिणाम होण्याची शक्यता; मुंबई महापालिकेचे नागरिकांना खबरदारीचे आवाहन
मुंबई : बृहन्मुंबई महानगरपालिकेच्या (BMC) पिसे-पांजरापूर संकुलातील येवई येथील महासंतुलक जलाशयाच्या कप्पा क्रमांक २ चे काम बुधवार, दि. २८ ऑक्टोबर २०२६ पासून सुरू होणार आहे. या कामामुळे मुंबईतील काही भागांमध्ये पाण्याच्या गुणवत्तेवर परिणाम होण्याची शक्यता महापालिकेने व्यक्त केली आहे. त्यामुळे नागरिकांनी पुढील सात दिवस पिण्याचे पाणी उकळून व गाळून वापरावे, असे आवाहन करण्यात आले आहे.
या कामाचा परिणाम मुंबई शहरातील एच, बी, ई, एफ दक्षिण आणि एफ उत्तर विभागांतील परिसरांवर, तसेच पूर्व उपनगरातील टी, एस, ई, एन आणि एल विभागांतील काही भागांवर होण्याची शक्यता आहे.
पिण्याच्या पाण्याच्या सुरक्षिततेच्या दृष्टीने नागरिकांनी खबरदारी घ्यावी आणि पुढील सात दिवस पाणी उकळून व गाळूनच प्यावे. तसेच पाणी वापरताना महापालिकेने दिलेल्या सूचनांचे पालन करावे, असे आवाहन प्रशासनाकडून करण्यात आले आहे.
