रावीत डोंगरे, काव्या गावंडे आणि समीक्षा गव्हाळे यांचा प्रथम क्रमांक; शाळेच्या वतीने यशस्वी विद्यार्थ्यांचा गौरव
मेहकर (प्रतिनिधी) : नवनीत पब्लिकेशनतर्फे आयोजित ‘युवा मास्टर स्ट्रोक’ चित्रकला स्पर्धेत राजश्री ग्लोबल स्कूल, मेहकर येथील विद्यार्थ्यांनी उल्लेखनीय यश संपादन केले. या स्पर्धेत तीन विद्यार्थ्यांनी प्रथम क्रमांक पटकावत शाळेचा नावलौकिक वाढविला.
स्पर्धेच्या गट ‘अ’ मधून यूकेजी-अ मधील रावीत शशिकांत डोंगरे आणि इयत्ता पहिलीतील काव्या प्रवीण गावंडे यांनी प्रथम क्रमांक मिळवला. तसेच गट ‘ब’ मधून इयत्ता तिसरीतील समीक्षा संतोष गव्हाळे हिने प्रथम क्रमांक पटकावला. विद्यार्थ्यांनी आपल्या चित्रकलेतील कौशल्याच्या जोरावर हे यश मिळविले.
विद्यार्थ्यांच्या शैक्षणिक प्रगतीसोबतच त्यांच्या सुप्त कलागुणांना वाव मिळावा, आत्मविश्वास वाढावा आणि सर्जनशीलतेला योग्य व्यासपीठ मिळावे, यासाठी शाळेचे कलाशिक्षक अजय बनचरे सातत्याने विद्यार्थ्यांना प्रोत्साहन देतात. त्यांच्या मार्गदर्शनाचा विद्यार्थ्यांना या स्पर्धेत लाभ झाला.
या यशाबद्दल नवनीत पब्लिकेशनकडून प्राप्त झालेली बक्षिसे यशस्वी विद्यार्थ्यांना तसेच कलाशिक्षक अजय बनचरे यांना शाळेच्या प्रार्थनेच्या वेळी प्रदान करण्यात आली. यावेळी शाळेच्या प्राचार्या सरिता खंडेलवाल, उपप्राचार्य प्रवीण गावंडे, प्रशासक मनोहर म्हळसणे, पर्यवेक्षिका विद्या मुळे, तसेच वर्गशिक्षिका कल्पना खेरोडकर, आरती अंभोरे आणि अश्विनी नागरिक यांच्या हस्ते विद्यार्थ्यांचा गौरव करण्यात आला.
विद्यार्थ्यांच्या या यशाबद्दल संस्थेच्या संचालिका राजश्रीताई जाधव आणि मयुरीताई जाधव यांनी विद्यार्थ्यांचे कौतुक करून त्यांना पुढील वाटचालीसाठी शुभेच्छा दिल्या. तसेच यशस्वी विद्यार्थ्यांच्या पालकांचेही अभिनंदन करण्यात आले.
या यशामुळे राजश्री ग्लोबल स्कूलमधील विद्यार्थ्यांच्या कलात्मक प्रतिभेला मिळणारे प्रोत्साहन अधोरेखित झाले असून, विद्यार्थ्यांच्या सर्जनशील विकासासाठी शाळेकडून करण्यात येणाऱ्या प्रयत्नांचे कौतुक होत आहे.
