महिला बचत गटांच्या समस्या जाणून घेण्याचा उपक्रम; स्थानिक उत्पादनांना प्राधान्य देण्याचे महिलांना आवाहन
मेहकर (प्रतिनिधी) : शिवसेना महिला आघाडीच्या तालुकाप्रमुख सौ. वैशाली सावजी यांनी मेहकर येथील राजमाता महिला बचत गट उद्योगाला भेट देऊन महिलांशी संवाद साधला. बचत गटातील महिलांच्या अडचणी जाणून घेऊन त्या सोडविण्यासाठी प्रयत्न करण्याचे आश्वासन त्यांनी यावेळी दिले. तसेच तालुक्यातील विविध बचत गटांना भेटी देऊन महिलांशी संपर्क साधणार असल्याचेही त्यांनी सांगितले.
केंद्रीय मंत्री प्रतापराव जाधव यांच्या प्रेरणेतून आणि माजी आमदार संजय रायमुलकर यांच्या माध्यमातून हा बचत गट सुरू झाल्याचे वैशाली सावजी यांनी नमूद केले. यावेळी बचत गटाच्या तालुकास्तरीय संचालिका जया ताई ढोरे यांच्याकडून त्यांनी तालुक्यातील बचत गटांच्या कामकाजाची माहिती घेतली.
बचत गटातील महिलांना काम करताना कोणत्या अडचणी येतात, काही समस्या आहेत का, याबाबत त्यांनी विचारपूस केली. महिलांनी आपल्या अडचणी त्यांच्यापर्यंत पोहोचवाव्यात, त्या सोडविण्यासाठी शक्य ते प्रयत्न केले जातील, असे त्यांनी सांगितले. यावेळी वंदना म्हस्के यांची वीजपुरवठ्यासंदर्भातील समस्या मार्गी लागल्याचेही त्यांनी नमूद केले.
दुष्काळी परिस्थितीचा विचार करून बचत गटांच्या वसुलीसाठी सक्ती करू नये, तसेच अडचणीच्या काळात महिलांच्या पाठीशी उभे राहावे, अशी भूमिका वैशाली सावजी यांनी व्यक्त केली.
बचत गटातील महिला स्वतःच्या हातांनी विविध वस्तू तयार करतात. त्यांच्या उत्पादनांना बाजारपेठ मिळावी आणि स्थानिक महिलांना रोजगाराच्या संधी उपलब्ध व्हाव्यात, यासाठी नागरिकांनी स्थानिक उत्पादनांच्या खरेदीला प्राधान्य द्यावे, असे आवाहन त्यांनी केले. पंतप्रधानांच्या ‘व्होकल फॉर लोकल’ संकल्पनेला प्रतिसाद देत स्थानिक उत्पादकांकडून वस्तू खरेदी केल्यास महिला बचत गटांना आर्थिक पाठबळ मिळेल, असेही त्यांनी सांगितले.
महिलांच्या समस्या जाणून घेणे, बचत गटांना प्रोत्साहन देणे आणि त्यांच्या अडचणी सोडविण्यासाठी सहकार्य करणे, हा या भेटीमागील उद्देश असल्याचे वैशाली सावजी यांनी स्पष्ट केले. तालुक्यातील बचत गटांच्या महिलांनी कोणत्याही अडचणी असल्यास संपर्क साधावा, असे आवाहनही त्यांनी यावेळी केले.
