विखरणी, विसापूर व गुजरखेडे गावांना भेट देत जाणून घेतल्या शेतकऱ्यांच्या समस्या; पंचनामे, नुकसानभरपाई, चारा छावण्या व टँकरसाठी पाठपुराव्याचे आश्वासन
येवला : प्रतिनिधी : पावसाच्या अभावामुळे येवला तालुक्यात निर्माण झालेल्या दुष्काळजन्य परिस्थितीमुळे शेतकरी संकटात सापडले आहेत. या पार्श्वभूमीवर बळीराजाला धीर देण्यासाठी माजी आमदार नरेंद्र भाऊ दराडे यांनी थेट शेतकऱ्यांच्या बांधावर जाऊन संवाद साधला. त्यांनी तालुक्यातील विखरणी, विसापूर आणि गुजरखेडे या गावांना भेट देऊन शेतकऱ्यांच्या अडचणी जाणून घेतल्या.
या पाहणी दौऱ्यादरम्यान त्यांनी शेतातील सुकलेली पिके, कोरड्या पडलेल्या विहिरी आणि पाणी व चाऱ्याच्या बिकट परिस्थितीची पाहणी केली. यावेळी शेतकऱ्यांनी पिकांचे मोठ्या प्रमाणावर झालेले नुकसान, पिण्याच्या पाण्याचा तीव्र तुटवडा, जनावरांच्या चाऱ्याचा प्रश्न तसेच वीजपुरवठ्याशी संबंधित अडचणी मांडल्या.
शेतकरी हा आपला अन्नदाता असून, दुष्काळाच्या या संकटात येवला तालुक्यातील बळीराजाला एकाकी पडू देणार नाही, असे आश्वासन नरेंद्र दराडे यांनी दिले. विखरणी, विसापूर, गुजरखेडे यांसह संपूर्ण परिसरातील पिकांचे पंचनामे, नुकसानभरपाई, चारा छावण्या आणि पाण्याचे टँकर तातडीने मंजूर व्हावेत, यासाठी शासनाकडे पाठपुरावा करून शेतकऱ्यांना सर्वतोपरी मदत मिळवून देण्याचा प्रयत्न करू, असेही त्यांनी सांगितले.
या दौऱ्यावेळी स्थानिक लोकप्रतिनिधी, शिवसेनेचे पदाधिकारी, कार्यकर्ते तसेच तिन्ही गावांतील ग्रामस्थ आणि शेतकरी मोठ्या संख्येने उपस्थित होते.
