१ नोव्हेंबरपासून विशेष बससेवा सुरू; पुणे, छत्रपती संभाजीनगर, आदमापूरसह प्रमुख मार्गांवर अतिरिक्त फेऱ्या
धारूर, दि. ३० ऑक्टोबर : दिवाळी सणाच्या पार्श्वभूमीवर प्रवाशांची वाढती गर्दी लक्षात घेऊन महाराष्ट्र राज्य मार्ग परिवहन महामंडळाच्या धारूर आगाराने विशेष नियोजन केले आहे. प्रवाशांना दिवाळीच्या सुट्ट्यांमध्ये आपल्या गावी, नातेवाईकांकडे तसेच धार्मिक व पर्यटनस्थळांकडे सुरक्षित आणि सुखकर प्रवास करता यावा, यासाठी विविध प्रमुख मार्गांवर एकूण २६ जादा बसफेऱ्यांचे नियोजन करण्यात आले आहे. या विशेष बसफेऱ्या रविवार, दि. १ नोव्हेंबर २०२६ पासून सुरू होणार आहेत.
धारूर आगारामार्फत धारूर ते आदमापूर (कोल्हापूर), मेहकर, पुणे, छत्रपती संभाजीनगर आणि अंबाजोगाई या मार्गांवर अतिरिक्त बससेवा उपलब्ध करून देण्यात येणार आहे.
धारूर ते आदमापूर (कोल्हापूर)
आदमापूर येथील धार्मिक स्थळाला भेट देणाऱ्या भाविकांच्या सोयीसाठी विशेष बससेवेचे नियोजन करण्यात आले आहे. धारूरहून सकाळी ७ वाजता बस रवाना होणार असून परतीची बसही सकाळी ७ वाजता उपलब्ध असेल. ही बस कळंब, बार्शी, पंढरपूर आणि कोल्हापूरमार्गे आदमापूर येथे जाणार आहे.
धारूर ते मेहकर
मेहकर व परिसरातील प्रवाशांसाठी धारूरहून सकाळी ७.१५ वाजता बस सुटणार असून मेहकर येथून परतीची बस दुपारी २ वाजता रवाना होणार आहे.
धारूर ते पुणे
शिक्षण, नोकरी आणि व्यवसायानिमित्त पुण्याकडे जाणाऱ्या प्रवाशांसाठी नियमित सेवेसोबत अतिरिक्त बसफेऱ्यांचे नियोजन करण्यात आले आहे. धारूरहून सकाळी ७.३०, ८.३०, ९ वाजता, दुपारी १ वाजता आणि रात्री ९.३० वाजता बस उपलब्ध असतील. तर पुण्याहून सकाळी ७, ८, ११.३० वाजता तसेच रात्री ९.३० आणि १० वाजता परतीच्या बस सुटतील.
धारूर ते छत्रपती संभाजीनगर
छत्रपती संभाजीनगरकडे जाणाऱ्या प्रवाशांची गैरसोय टाळण्यासाठी अतिरिक्त बसफेऱ्या सुरू करण्यात येणार आहेत. धारूरहून सकाळी ६, ६.४५, ७.४५, ८.१५ आणि ८.४५ वाजता बस सुटतील. छत्रपती संभाजीनगर येथून परतीच्या बस सकाळी ११.३० वाजता तसेच दुपारी १.१५, १.४५, २.१५ आणि २.४५ वाजता उपलब्ध असतील.
धारूर ते अंबाजोगाई दर अर्ध्या तासाला बस
धारूर ते अंबाजोगाई मार्गावर प्रवाशांच्या सोयीसाठी सकाळी ६.१५ ते रात्री ८.१५ वाजेपर्यंत दर अर्ध्या तासाने बससेवा उपलब्ध करून देण्यात येणार आहे. धारूर आणि अंबाजोगाई या दोन्ही बसस्थानकांवरून प्रवाशांना या सेवेचा लाभ घेता येणार आहे.
एस.टी. बससेवेचा लाभ घेण्याचे आवाहन
दिवाळीच्या काळात प्रवाशांची होणारी अतिरिक्त गर्दी लक्षात घेऊन धारूर आगाराने जादा बसफेऱ्यांचे नियोजन केले आहे. प्रवाशांनी सुरक्षित आणि विश्वासार्ह एस.टी. बससेवेचा लाभ घ्यावा, असे आवाहन करण्यात आले आहे.
प्रवाशांचा प्रवास सुखकर, सुरक्षित आणि वेळेत व्हावा, यासाठी धारूर आगारातील अधिकारी व कर्मचारी कटिबद्ध असल्याचे आगार व्यवस्थापक संतोष नागनाथ महाजन यांनी सांगितले. प्रवाशांनी दिवाळी विशेष बससेवेचा जास्तीत जास्त लाभ घ्यावा, असे आवाहनही त्यांच्या वतीने करण्यात आले आहे.
“प्रवाशांच्या सेवेसाठी कटिबद्ध… सुरक्षित प्रवास, आनंदी प्रवास!”
