अभिनेत्री तेजश्री प्रधान यांच्या हस्ते शाल, श्रीफळ व सन्मानचिन्ह देऊन गौरव; सामाजिक कार्याची घेतली दखल
हिंजवडी, पुणे : शांताई माता बहुउद्देशीय सेवाभावी संस्थेचे संस्थापक अध्यक्ष श्री. विष्णूदास रामदास वैष्णव यांचा सामाजिक क्षेत्रातील उल्लेखनीय कार्याबद्दल पुण्यात विशेष सत्कार करण्यात आला. हिंजवडी येथील प्रसिद्ध क्लाउड ९९ येथे हा गौरव सोहळा उत्साहात पार पडला. प्रोव्हन पायवे संस्थेच्या वतीने या कार्यक्रमाचे आयोजन करण्यात आले होते.
या सोहळ्यास प्रसिद्ध सिनेअभिनेत्री तेजश्री प्रधान प्रमुख पाहुण्या म्हणून उपस्थित होत्या. त्यांच्या हस्ते विष्णूदास वैष्णव यांना शाल, श्रीफळ आणि सन्मानचिन्ह प्रदान करून गौरविण्यात आले.
यावेळी प्रमुख पाहुणे म्हणून श्री. प्रणव केंद्रे, श्री. विवेक ठाकूर, श्री. धनराज बैरागी, सौ. कविता शिंदे, सौ. रेणुका बैरागी आणि सौ. सुषमा बैरागी यांच्यासह अनेक मान्यवर, सामाजिक कार्यकर्ते व नागरिक मोठ्या संख्येने उपस्थित होते.
शांताई माता बहुउद्देशीय सेवाभावी संस्थेच्या माध्यमातून गरीब व गरजू नागरिकांसाठी करण्यात येणाऱ्या सेवाभावी कार्याची दखल घेऊन हा सन्मान प्रदान करण्यात आला. संस्थेच्या माध्यमातून वैष्णव यांनी सामाजिक क्षेत्रात दिलेल्या योगदानाचा यावेळी गौरव करण्यात आला.
याप्रसंगी अभिनेत्री तेजश्री प्रधान म्हणाल्या, “हा फक्त सत्कार नाही, तर त्यांनी केलेल्या निस्वार्थ सेवेची ही पोचपावती आहे. त्यांचे कार्य समाजासाठी प्रेरणादायी आहे.”
सत्काराला उत्तर देताना विष्णूदास रामदास वैष्णव म्हणाले, “क्लाउड ९९ सारख्या सुंदर ठिकाणी झालेला हा सन्मान माझ्यासाठी अविस्मरणीय आहे. या पुरस्कारामुळे मला काम करण्याची नवी ऊर्जा मिळाली असून, यापुढे मी अधिक जोमाने सामाजिक कार्य करत राहीन.”
या गौरव सोहळ्यामुळे विष्णूदास वैष्णव यांच्या सामाजिक कार्याची पुन्हा एकदा दखल घेतली गेली असून, नाशिक-पुणे परिसरातून त्यांच्यावर अभिनंदनाचा वर्षाव होत आहे.
