तिसगाव केंद्रातील ६१ शिक्षकांचा पुढाकार; प्रारंभी १०० दर्जेदार पुस्तकांचा संग्रह उपलब्ध
प्रतिनिधी / तिसगाव : वाचन संस्कृतीला चालना देण्यासोबतच शिक्षकांमध्ये वाचनाची आवड निर्माण व्हावी आणि ज्ञानाची देवाणघेवाण वाढावी, या उद्देशाने पाथर्डी तालुक्यातील तिसगाव केंद्रांतर्गत येणाऱ्या १८ जिल्हा परिषद प्राथमिक शाळांमधील ६१ शिक्षकांनी एकत्र येत ‘कुसुमाग्रज वाचनालय’ हा अभिनव उपक्रम सुरू केला आहे. शिक्षकांनी स्वतःच्या वर्गणीतून उभारलेल्या या वाचनालयाचा शुभारंभ उत्साहात पार पडला.
मुख्य कार्यकारी अधिकारी आणि शिक्षणाधिकारी यांच्या मार्गदर्शनाखाली सुरू करण्यात आलेल्या या वाचनालयात सुरुवातीला विविध विषयांवरील सुमारे १०० दर्जेदार पुस्तके उपलब्ध करून देण्यात आली आहेत. विशेष म्हणजे, हा उपक्रम केवळ उद्घाटनापुरता मर्यादित न ठेवता पहिल्याच दिवशी केंद्रातील प्रत्येक शिक्षकाने वाचनालयातून एक पुस्तक वाचनासाठी घेतले. त्यामुळे शिक्षकांनी कृतीतूनच वाचन संस्कृतीचा श्रीगणेशा केला.
तिसगावचे सरपंच इलियास शेख यांच्या हस्ते वाचनालयाचे उद्घाटन करण्यात आले. या कार्यक्रमाला ऑनलाइन माध्यमातून पाथर्डी-शेवगावच्या आमदार मोनिकाताई राजळे, पाथर्डीचे नगराध्यक्ष अभय आव्हाड, उपनगराध्यक्षा मंगल कोकाटे, शिक्षणाधिकारी भास्कर पाटील, गटशिक्षणाधिकारी सचिन राख, विस्तार अधिकारी अनिल भवार, रामनाथ कराड, निलेश क्षीरसागर, केंद्रप्रमुख रामदास आव्हाड, विषयतज्ज्ञ संतोष नरवडे यांच्यासह केंद्रातील सर्व शिक्षक व शिक्षिका उपस्थित होते.
शिक्षकांनी शिक्षकांसाठी सुरू केलेला हा उपक्रम वाचनाची आवड जोपासण्याबरोबरच ज्ञानाची देवाणघेवाण, अध्यापनातील नवनवीन संकल्पना आणि शिक्षकांच्या व्यावसायिक विकासाला चालना देणारा ठरणार आहे. तिसगाव केंद्रातील शिक्षकांच्या या सामूहिक पुढाकाराचे शैक्षणिक वर्तुळातून कौतुक होत आहे.
