दिवाळीच्या सुट्ट्यांच्या पार्श्वभूमीवर मध्य रेल्वेचा निर्णय; ३० ऑक्टोबरपासून नेरळ-माथेरान मिनी ट्रेन सेवा सुरू
माथेरान
महाराष्ट्रातील सुप्रसिद्ध पर्यटनस्थळ असलेल्या माथेरानची आकर्षणाची ओळख असलेली नेरळ-माथेरान मिनी ट्रेन सेवा पावसाळी विश्रांतीनंतर शुक्रवार, दि. ३० ऑक्टोबर २०२६ रोजी पुन्हा सुरू करण्यात आली. त्यामुळे माथेरानकरांसह पर्यटकांमध्ये समाधान आणि आनंदाचे वातावरण निर्माण झाले आहे.
दरवर्षी १५ जूनपासून मुसळधार पाऊस आणि दरड कोसळण्याची शक्यता लक्षात घेऊन मध्य रेल्वेकडून नेरळ-माथेरान मिनी ट्रेन सेवा पावसाळ्यातील चार महिन्यांसाठी बंद ठेवली जाते. ही मिनी ट्रेन पर्यटकांचे प्रमुख आकर्षण असल्याने सेवा पुन्हा सुरू होण्याची पर्यटक आतुरतेने वाट पाहत असतात.
नेरळ येथून अवघ्या १०० रुपयांत माथेरानपर्यंत पोहोचण्याची संधी मिळत असल्याने अनेक पर्यटक मिनी ट्रेनने प्रवास करण्यास पसंती देतात. निसर्गरम्य डोंगररांगांमधून होणारा हा रेल्वे प्रवास पर्यटकांसाठी विशेष आकर्षण ठरतो.
दरम्यान, अमन लॉज-माथेरान शटल सेवा वर्षभर सुरू असते. त्यामुळे पर्यटकांना मिनी ट्रेनच्या प्रवासाचा आनंद घेता येतो. आता दिवाळीच्या सुट्ट्यांमध्ये माथेरानमध्ये पर्यटकांची मोठी गर्दी होण्याची शक्यता लक्षात घेऊन मध्य रेल्वेने पावसाळी विश्रांतीनंतर नेरळ-माथेरान मिनी ट्रेन सेवा पुन्हा सुरू केली आहे. या निर्णयामुळे पर्यटनाला चालना मिळण्यास मदत होणार असून, पर्यटकांनीही या सेवेचे स्वागत केले आहे.
