मतदार जनजागृतीसाठी लावलेला फलक जमिनीवर; तातडीने योग्य ठिकाणी लावण्याची नागरिकांची मागणी
केज प्रतिनिधी | सारथी महाराष्ट्राचा
केज : मतदार यादीच्या विशेष सखोल पुनरीक्षण (SIR) प्रक्रियेबाबत नागरिकांमध्ये जनजागृती व्हावी, यासाठी निवडणूक आयोगाकडून विविध उपक्रम राबविले जात आहेत. मात्र, केज तहसील कार्यालयाच्या परिसरात या जनजागृतीसाठी लावण्यात आलेला फलक जमिनीवर पडलेल्या अवस्थेत आढळून आल्याने प्रशासनाच्या कार्यपद्धतीवर प्रश्नचिन्ह उपस्थित होत आहे.
मतदार नोंदणी, मतदार यादीतील नावांची तपासणी, दुरुस्ती तसेच SIR प्रक्रियेविषयी महत्त्वाची माहिती नागरिकांपर्यंत पोहोचावी, हा या फलकामागील उद्देश आहे. तहसील कार्यालयात विविध कामांसाठी येणाऱ्या नागरिकांना आणि नवमतदारांना या माहितीचा उपयोग व्हावा, अशी अपेक्षा आहे. मात्र, कार्यालयाच्या आवारातच हा फलक योग्य ठिकाणी लावलेला नसल्याने जनजागृतीच्या उद्देशालाच हरताळ फासला जात असल्याची भावना नागरिक व्यक्त करीत आहेत.
विशेष म्हणजे, तालुक्याचा प्रशासकीय कारभार चालणाऱ्या तहसील कार्यालयातच शासकीय जनजागृती साहित्याची योग्य देखभाल होत नसेल, तर प्रशासनाच्या नियोजनाबाबत प्रश्न निर्माण होणे स्वाभाविक आहे. हा केवळ एका फलकाच्या दुरवस्थेचा विषय नसून शासकीय उपक्रमांची अंमलबजावणी आणि देखभाल याकडे किती गांभीर्याने पाहिले जाते, याचाही मुद्दा असल्याचे नागरिकांचे म्हणणे आहे.
दरम्यान, शेतकऱ्यांना अतिवृष्टीमुळे झालेल्या नुकसानीची भरपाई, पीकविमा आणि इतर शासकीय योजनांसाठी तहसील कार्यालयात वारंवार जावे लागते. तसेच विविध मागण्यांसाठी उपोषण करणाऱ्या नागरिकांचे प्रश्नही प्रशासनासमोर येत असतात. अशा परिस्थितीत जनतेच्या समस्या सोडविण्याबाबत प्रशासन किती तत्पर आहे, असा सवाल स्थानिक नागरिकांकडून उपस्थित केला जात आहे.
केजमधील जागरूक नागरिक आणि सामाजिक कार्यकर्त्यांनी या प्रकाराबाबत नाराजी व्यक्त केली आहे. संबंधित अधिकाऱ्यांनी या फलकाची तातडीने दखल घेऊन तो नागरिकांना सहज दिसेल अशा योग्य ठिकाणी व्यवस्थित लावावा, तसेच शासकीय जनजागृती साहित्याची नियमित देखभाल करावी, अशी मागणी होत आहे.
लोकशाही प्रक्रियेत मतदार जनजागृतीला महत्त्वाचे स्थान आहे. त्यामुळे केवळ फलक लावण्यापुरती जनजागृती मर्यादित न ठेवता, त्याची योग्य देखभाल आणि नागरिकांपर्यंत माहिती पोहोचविण्याची जबाबदारीही प्रशासनाने गांभीर्याने पार पाडावी, अशी अपेक्षा व्यक्त होत आहे.
