दुष्काळी परिस्थितीत मेहकर-लोणार तालुक्यातील शेतकऱ्यांना दिलासा; आठवड्यातून तीन दिवस पाणीपुरवठा, काटकसरीने वापरण्याचे आवाहन
मेहकर / प्रतिनिधी
यंदा संपूर्ण महाराष्ट्रासह बुलढाणा जिल्ह्यात दुष्काळसदृश्य परिस्थिती निर्माण झाली असून, मेहकर तालुक्याचाही दुष्काळग्रस्त परिस्थितीत समावेश करण्यात आला आहे. पिण्याच्या पाण्याचा साठा राखीव ठेवण्यासाठी शासनाने शेतकऱ्यांचे वीज कनेक्शन बंद केले होते. त्यामुळे तूर, हरभरा, हळद आणि कपाशीसारख्या खरीप पिकांना आवश्यक पाणी न मिळाल्याने पिकांचे नुकसान होत आहे. ही परिस्थिती लक्षात घेऊन खरीप पिकांसाठी पेनटाकळी प्रकल्पातून पाणी सोडण्याचा निर्णय घेण्यात आला आहे, अशी माहिती केंद्रीय मंत्री प्रतापराव जाधव यांनी दिली.
गेल्या पंधरा दिवसांपासून प्रतापराव जाधव यांनी शेतकरी आणि सिंचन विभागाशी संबंधित अधिकाऱ्यांच्या बैठका घेऊन परिस्थितीचा आढावा घेतला. आज जिल्हाधिकारी कार्यालयात झालेल्या बैठकीत धरणांमधील पिण्याच्या पाण्यासाठी राखीव साठा, बाष्पीभवन आणि दहा टक्के आरक्षित कोटा वगळल्यानंतर उपलब्ध होणारे पाणी शेतीसाठी कसे वापरता येईल, यावर सविस्तर चर्चा करण्यात आली.
जिल्हाधिकारी, सिंचन विभागाचे अधिकारी, पालकमंत्री आणि संबंधित अधिकाऱ्यांच्या उपस्थितीत झालेल्या चर्चेनंतर पेनटाकळी प्रकल्पातून खरीप पिकांसाठी पाणी सोडण्याचा निर्णय घेण्यात आला. या निर्णयामुळे ऐन गरजेच्या वेळी मेहकर आणि लोणार तालुक्यातील हजारो शेतकऱ्यांना मोठा दिलासा मिळणार आहे. चारा पिकांसाठीही उपलब्ध पाण्याचा उपयोग करण्याबाबत चर्चा करण्यात आली.
या पाणीपुरवठ्याचे नियोजन आठवड्यातून तीन दिवस पाणी आणि उर्वरित चार दिवस फिडर बंद असे करण्यात आले आहे. त्यामुळे शेतकऱ्यांनी उपलब्ध पाण्याचा काटकसरीने वापर करावा, असे आवाहन प्रतापराव जाधव यांनी केले.
तसेच या पाण्याचा वापर केवळ खरीप पिकांसाठी करावा, रब्बी पिकांसाठी पाण्याचा वापर करू नये आणि अवैध पाणीउपसा करू नये, असे स्पष्ट निर्देश त्यांनी दिले. नियमांचे उल्लंघन करणाऱ्यांवर कारवाई करण्यात येईल, असा इशाराही त्यांनी दिला.
