रात्री १० वाजण्याच्या सुमारास घटना; ग्रामस्थांचे आग विझविण्याचे प्रयत्न निष्फळ, दुकानदाराचे मोठे आर्थिक नुकसान
केज | प्रतिनिधी
बीड जिल्ह्यातील केज तालुक्यातील होळ येथे सायकल मार्ट दुकानाला लागलेल्या भीषण आगीत दुकानातील लाखो रुपयांचा माल जळून खाक झाला. गुरुवार, दि. १२ नोव्हेंबर रोजी रात्री सुमारे १० वाजण्याच्या सुमारास ही घटना घडली. या आगीत दुकानदाराचे मोठे आर्थिक नुकसान झाले असून परिसरात हळहळ व्यक्त होत आहे.
होळ येथील रघुनाथ मानिक घुगे यांच्या मालकीच्या सायकल मार्ट दुकानाला अचानक आग लागली. काही क्षणांतच आगीने रौद्ररूप धारण केले. दुकानाला आग लागल्याचे समजताच ग्रामस्थांनी घटनास्थळी धाव घेत आग विझविण्यासाठी आटोकाट प्रयत्न केले. मात्र, आग प्रचंड असल्याने ग्रामस्थांचे प्रयत्न निष्फळ ठरले. पाहता पाहता संपूर्ण दुकान आगीच्या भक्ष्यस्थानी पडले आणि दुकानातील लाखो रुपयांचा माल जळून खाक झाला.
आगीचे कारण अस्पष्ट; दुकानदाराचे मोठे नुकसान
आग नेमकी कशामुळे लागली, याचे कारण अद्याप स्पष्ट झालेले नाही. या दुर्घटनेमुळे रघुनाथ घुगे यांचे मोठे आर्थिक नुकसान झाले आहे. कष्टाने उभा केलेला व्यवसाय आगीत उद्ध्वस्त झाल्याने नुकसानग्रस्त दुकानदाराला शासनाकडून आर्थिक मदत मिळावी, अशी अपेक्षा परिसरातील नागरिकांकडून व्यक्त होत आहे.
व्यावसायिकांच्या सुरक्षेचा प्रश्न ऐरणीवर!
तालुक्यात आगीच्या घटनांमुळे व्यापारी आणि व्यावसायिकांचे मोठ्या प्रमाणात आर्थिक नुकसान होत असल्याचे चित्र आहे. कष्टाने उभा केलेला व्यवसाय काही क्षणांत आगीच्या भक्ष्यस्थानी पडत असल्याने व्यावसायिकांमध्ये चिंतेचे वातावरण निर्माण झाले आहे.
अशा दुर्घटना टाळण्यासाठी बाजारपेठांमध्ये अग्निसुरक्षा यंत्रणा सक्षम करणे, अग्निशमन सुविधांची उपलब्धता वाढविणे आणि आपत्कालीन परिस्थितीत तातडीने मदत पोहोचविणे आवश्यक असल्याची मागणी नागरिकांकडून होत आहे.
