लोककलेच्या संवर्धनासाठी १६ व १७ जानेवारीला चिपळूणमध्ये भव्य सांस्कृतिक सोहळ्याचे आयोजन
रत्नागिरी | प्रतिनिधी
कोकणच्या समृद्ध लोककला, लोकपरंपरा, लोकसंगीत आणि सांस्कृतिक वैभवाला व्यापक व्यासपीठ मिळवून देण्याच्या उद्देशाने ‘कोकण लोककला महोत्सव २०२७’चे आयोजन करण्यात आले आहे. एक्सप्लोर कोकण, कोकण रिपोर्टर आणि व्हिजन थ्री न्यूज यांच्या संयुक्त विद्यमाने १६ व १७ जानेवारी २०२७ रोजी चिपळूण येथील इंदिरा गांधी सांस्कृतिक केंद्रात हा दोन दिवसीय भव्य सांस्कृतिक सोहळा रंगणार आहे. आयोजक सतीश कदम, मकरंद भागवत आणि राजेंद्रकुमार शिंदे यांनी पत्रकार परिषदेत ही माहिती दिली.
पाच जिल्ह्यांतील मान्यवरांना निमंत्रण
या महोत्सवासाठी पालघर, ठाणे, रायगड, रत्नागिरी आणि सिंधुदुर्ग या पाच जिल्ह्यांतील मंत्री, खासदार, आमदार, विविध लोकप्रतिनिधी, प्रशासकीय अधिकारी, नामवंत उद्योजक, व्यावसायिक तसेच सामाजिक, सांस्कृतिक आणि शैक्षणिक क्षेत्रातील मान्यवरांना निमंत्रित करण्यात येत आहे. सर्वांच्या सहभागातून कोकणच्या सांस्कृतिक वैभवाचा हा सोहळा अधिक व्यापक करण्याचा आयोजकांचा प्रयत्न आहे.
दशावतारापासून तारपा नृत्यापर्यंत लोककलांची मेजवानी
या महोत्सवात कोकणच्या मातीत रुजलेल्या विविध पारंपरिक लोककलांचे सादरीकरण होणार आहे. यामध्ये दशावतार, पालखी सोहळ्यातील पारंपरिक नृत्य, नकटा, संकासूर, जाखडी, कोळी नृत्य, चपई नृत्य, काटखेळे, वारली नृत्य, धनगरी गजा नृत्य, आदिवासी पारंपरिक नृत्य आणि कातकरी नृत्य अशा विविध कलाप्रकारांचा समावेश आहे.
महोत्सवाचे विशेष आकर्षण म्हणजे पद्मश्री पुरस्कारप्राप्त भिकल्या लाडक्या धिंडाबाबा यांची उपस्थिती. ते प्रसिद्ध पारंपरिक तारपा वाद्याचे सादरीकरण करणार असून त्यांचा यथोचित सन्मानही करण्यात येणार आहे. याशिवाय कोकणच्या संस्कृतीवर आधारित स्थानिक कलाकारांची नृत्य सादरीकरणे आणि इतर पारंपरिक कलाप्रकारांनाही व्यासपीठ उपलब्ध करून दिले जाणार आहे.
ज्येष्ठ लोककलावंतांचा विशेष गौरव
हा महोत्सव केवळ मनोरंजनापुरता मर्यादित न राहता कोकणच्या लोकसंस्कृतीचे जतन, संवर्धन आणि पुढील पिढीकडे तिचे हस्तांतरण करण्याचे महत्त्वपूर्ण माध्यम ठरणार आहे. लोककलेच्या क्षेत्रात आयुष्यभर योगदान देणाऱ्या ज्येष्ठ लोककलावंतांचा विशेष गौरव करून त्यांच्या कार्याचा सन्मान करण्यात येणार आहे.
कोकणच्या सांस्कृतिक स्वाभिमानाचा उत्सव
कोकणची लोककला ही केवळ मनोरंजनाची परंपरा नसून येथील लोकजीवन, श्रद्धा, इतिहास आणि सामाजिक संस्कृतीचे प्रतिबिंब आहे. आधुनिकतेच्या प्रवाहात पारंपरिक लोककला लोप पावू नयेत, लोककलावंतांना योग्य सन्मान आणि व्यासपीठ मिळावे, तसेच नव्या पिढीला आपल्या सांस्कृतिक मुळांची ओळख व्हावी, या व्यापक उद्देशाने महोत्सवाचे आयोजन करण्यात आले आहे.
‘कोकण लोककला महोत्सव २०२७’ हा दोन दिवसांचा कार्यक्रम न राहता कोकणची माती, परंपरा, लोककलावंतांची कला आणि सांस्कृतिक स्वाभिमानाचा उत्सव ठरेल. कोकणच्या लोककलेचा आवाज संपूर्ण महाराष्ट्रात पोहोचविण्याच्या दिशेने हा महोत्सव महत्त्वपूर्ण पाऊल ठरेल, असा विश्वास आयोजक सतीश कदम, मकरंद भागवत आणि राजेंद्रकुमार शिंदे यांनी व्यक्त केला.
