मोरावळे गावच्या पुलावर अपघात; जखमींना सातारा येथील सर्वसाधारण रुग्णालयात दाखल
प्रतिनिधी
सातारा–मेढा–महाबळेश्वर मार्गावरील मोरावळे गावच्या पुलावर दि. १४ रोजी दुपारी दोन ॲक्टिव्हा दुचाकींची समोरासमोर जोरदार धडक होऊन भीषण अपघात झाला. या अपघातात दोन युवक गंभीर जखमी झाले असून दोन्ही दुचाकींचे मोठ्या प्रमाणात नुकसान झाले आहे.
मिळालेल्या प्राथमिक माहितीनुसार, जखमींपैकी एक युवक महाबळेश्वर येथील, तर दुसरा मेढा परिसरातील जवळवाडी गावचा असल्याचे समजते. धडक इतकी जोरदार होती की दोन्ही दुचाकींचे मोठे नुकसान झाले.
अपघाताची माहिती मिळताच परिसरातील नागरिकांनी घटनास्थळी धाव घेत मदतकार्य सुरू केले. मेढा पोलीस ठाण्याला याबाबत माहिती देण्यात आली. त्यानंतर जखमी युवकांना उपचारासाठी सातारा येथील सर्वसाधारण रुग्णालयात दाखल करण्यात आले.
दरम्यान, याच ठिकाणी गेल्या आठवड्यातही दोन दुचाकींची समोरासमोर धडक होऊन एका दुचाकीस्वाराचा मृत्यू झाला होता. त्यामुळे मोरावळे पुलावरील अपघातांची पुनरावृत्ती रोखण्यासाठी प्रशासनाने तातडीने उपाययोजना कराव्यात, अशी मागणी परिसरातील नागरिकांकडून होत आहे.
