मोळी पूजन व गव्हाण पूजनाने हंगामाला सुरुवात; शेतकरी आणि कामगारांनी सहकार्य करण्याचे आमदार हेमंत पाटील यांचे आवाहन
पोफाळी | दि. १५ नोव्हेंबर
वसंत सहकारी साखर कारखाना द्वार भैरवनाथ शुगर वर्क्स, वसंतनगर पोफाळी येथे सन २०२६-२७ च्या गळीत हंगामाचा शुभारंभ रविवार, दि. १५ नोव्हेंबर रोजी उत्साहात करण्यात आला. पारंपरिक पद्धतीने मोळी पूजन आणि गव्हाण पूजन करून गळीत हंगामाला प्रारंभ झाला.
यावेळी कारखाना परिसरात बैलजोडी, ट्रॅक्टर, वजनकाटा आणि मोळीचे पूजन करण्यात आले. त्यानंतर गव्हाणीत ऊस टाकून गाळप हंगाम सुरू करण्यात आला. यंदा कारखान्याने ऊस गाळपाचे मोठे उद्दिष्ट ठेवले असून, शेतकऱ्यांना वेळेवर आणि चांगला भाव देण्याचा विश्वास कारखाना व्यवस्थापनाकडून व्यक्त करण्यात आला.
या कार्यक्रमाला कारखान्याचे चेअरमन अजय देशमुख, भैरवनाथ शुगरचे अधिकारी, आमदार हेमंत पाटील, उमरखेड-महागाव विधानसभा मतदारसंघाचे आमदार किसनराव वानखेडे, रमेश चव्हाण, भीमराव चंद्रवंशी, चिंतागाराव कदम, राजश्रीताई पाटील आदी मान्यवर उपस्थित होते. तसेच परिसरातील प्रतिष्ठित शेतकरी, ऊस उत्पादक, कामगार, कर्मचारी आणि पत्रकार मोठ्या संख्येने सहभागी झाले होते.
गेल्या काही दिवसांपासून कारखाना सुरू होणार की नाही, याबाबत शेतकऱ्यांमध्ये संभ्रमाचे वातावरण होते. मात्र, प्रत्यक्ष गळीत हंगाम सुरू झाल्याने ऊस उत्पादक शेतकऱ्यांमध्ये आनंदाचे वातावरण निर्माण झाले आहे. शेतकऱ्यांनी ऊस तोडणी आणि वाहतुकीचे योग्य नियोजन करावे, असे आवाहन यावेळी करण्यात आले. शेतकरी आणि कामगारांच्या सहकार्याने यंदाचा हंगाम यशस्वी करण्याचा निर्धार उपस्थित मान्यवरांनी व्यक्त केला.
वसंत सहकारी साखर कारखाना हा या भागाचे वैभव असून, तो प्रामाणिकपणे सुरू ठेवण्याचा आपला मानस असल्याचे आमदार हेमंत पाटील यांनी सांगितले. कारखाना सुरू होऊन चार वर्षे होत असली, तरी अद्याप कारखान्यातून एक रुपयाचीही कमाई झालेली नाही, असे त्यांनी नमूद केले.
तरीही हा कारखाना जोमाने सुरू ठेवायचा असून, परिसरातील बेरोजगार तरुणांना रोजगाराच्या संधी उपलब्ध करून द्यायच्या आहेत. यासाठी परिसरातील सर्व शेतकरी आणि कारखान्याच्या कामगारांनी सर्वतोपरी सहकार्य करावे, असे आवाहन आमदार हेमंत पाटील यांनी केले.









