कामावर जाण्यासाठी बसस्थानकाकडे जात असताना दगड व लोखंडी दांडक्याने हल्ला; अज्ञात हल्लेखोराचा शोध सुरू
पुरंदर | प्रतिनिधी :
पुरंदर तालुक्यातील पांगारे येथे ४९ वर्षीय शिक्षिकेची निर्घृण हत्या झाल्याची घटना समोर आली आहे. उज्वला रामदास काकडे (वय ४९) असे मृत शिक्षिकेचे नाव असून, त्या हडपसर येथील साधना शाळेत शिक्षिका म्हणून कार्यरत होत्या. कामावर जाण्यासाठी बसस्थानकाकडे जात असताना अज्ञात व्यक्तीने त्यांच्यावर दगड आणि लोखंडी दांडक्याने हल्ला केल्याची प्राथमिक माहिती आहे.
मिळालेल्या माहितीनुसार, गुरुवारी सकाळी साडेआठच्या सुमारास उज्वला काकडे या नेहमीप्रमाणे कामावर जाण्यासाठी बसस्थानकाच्या दिशेने जात होत्या. त्याचवेळी अज्ञात हल्लेखोराने त्यांच्यावर अचानक हल्ला केला. या हल्ल्यात गंभीर जखमी झाल्याने त्यांचा मृत्यू झाला.
घटनेची माहिती मिळताच सासवड पोलिसांनी तातडीने घटनास्थळी धाव घेतली. पोलिसांनी घटनास्थळाची पाहणी करून तपास सुरू केला आहे. मृतदेह उत्तरीय तपासणीसाठी ग्रामीण रुग्णालयात पाठविण्यात आला आहे.
भरदिवसा घडलेल्या या घटनेमुळे पांगारे गावासह संपूर्ण पुरंदर तालुक्यात भीती आणि चिंतेचे वातावरण निर्माण झाले आहे. हत्येमागील नेमके कारण अद्याप स्पष्ट झालेले नाही. अज्ञात हल्लेखोराची ओळख पटवून त्याला ताब्यात घेण्याचे आव्हान सासवड पोलिसांसमोर आहे.
पोलिसांकडून विविध शक्यतांच्या अनुषंगाने तपास सुरू असून, या घटनेचा छडा लावून आरोपीला तातडीने अटक करावी, अशी मागणी नागरिकांकडून होत आहे.









