मुख्य रस्त्याच्या दुरवस्थेकडे प्रशासनाचे लक्ष वेधले; धनगरवाडीबाहेरील कामांना ना हरकत प्रमाणपत्र देऊ नये, अन्यथा आंदोलनाचा इशारा
सावंतवाडी | प्रतिनिधी :
मौजे माडखोल (ता. सावंतवाडी) येथील धनगरवाडी वस्तीच्या विकासासाठी मंजूर होणारा निधी मूळ वस्तीपासून दूर असलेल्या कामांवर खर्च करण्याचा प्रयत्न होत असल्याचा आरोप राष्ट्रीय दिव्यांग पार्टीने केला आहे. या प्रकाराविरोधात पक्षाचे नेते संजय बाबुराव देसाई यांच्या नेतृत्वाखाली सामाजिक कार्यकर्त्या व माडखोल धनगरवाडीतील ग्रामस्थांनी १९ नोव्हेंबर रोजी सहाय्यक संचालक (इतर मागास बहुजन कल्याण), सिंधुदुर्ग आणि माडखोल ग्रामपंचायत प्रशासनाकडे लेखी तक्रार दाखल केली.
वसंतराव नाईक तांडा/वस्ती सुधार योजनेंतर्गत सन २०२६-२७ साठी माडखोल गावातील दोन रस्त्यांच्या कामांचे प्रस्ताव मागविण्यात आले आहेत. मात्र, प्रस्तावित दोन्ही कामे मूळ धनगरवाडी वस्तीपासून दूर असून, त्यांचा धनगर समाजातील वस्तीधारकांना थेट लाभ होणार नसल्याचा आक्षेप तक्रारदारांनी घेतला आहे. दुसरीकडे, धनगरवाडीचा मुख्य रस्ता पूर्णपणे नादुरुस्त झाला असून, ग्रामस्थांसह वृद्ध नागरिक आणि विद्यार्थ्यांना ये-जा करताना मोठ्या अडचणींचा सामना करावा लागत असल्याचे त्यांनी निवेदनात नमूद केले आहे.
या प्रकरणी राष्ट्रीय दिव्यांग पार्टीचे नेते संजय बाबुराव देसाई, येसार सोशल फाउंडेशनच्या सामाजिक कार्यकर्त्या वासंती महेश परुळेकर, महिला सर्वांगीण उत्कर्ष मंडळ, पुणेच्या सामाजिक कार्यकर्त्या अन्विता अभय जाधव, माजी पोलीस पाटील लक्ष्मण बरागडे आणि सौ. जान्हवी पाटील यांनी ग्रामस्थांसह प्रशासनाकडे भूमिका मांडली.
तांडा-वस्ती सुधार योजनेचा निधी संबंधित वस्तीतील नागरिकांना थेट लाभ होईल अशाच कामांसाठी खर्च करण्यात यावा, अशी मागणी यावेळी करण्यात आली. धनगरवाडीबाहेरील कामांना ग्रामपंचायतीने ना हरकत प्रमाणपत्र (NOC) देऊ नये आणि धनगरवाडीच्या मुख्य रस्त्याचा सुधारित प्रस्ताव तातडीने मंजुरीसाठी पाठवावा, अशी मागणीही करण्यात आली.
या मागण्यांकडे दुर्लक्ष झाल्यास राष्ट्रीय दिव्यांग पार्टीच्या वतीने धनगरवाडीतील ग्रामस्थांना सोबत घेऊन तीव्र आंदोलन छेडण्यात येईल, असा इशारा संजय बाबुराव देसाई, वासंती महेश परुळेकर, अन्विता अभय जाधव आणि माजी पोलीस पाटील लक्ष्मण बरागडे यांनी दिला.
यावेळी धनगरवाडीतील ग्रामपंचायत सदस्य सौ. जान्हवी जणू पाटील, ज्येष्ठ नागरिक बाबू येडगे, खंडू बरागडे, रवी येडगे, राजेश येडगे, गंगाराम बरागडे यांच्यासह मोठ्या संख्येने ग्रामस्थ उपस्थित होते.











