पहाटे आणि रात्री थंडीचा जोर अधिक; शेतकरी, शेतमजूर, दूध उत्पादकांसह विद्यार्थ्यांनाही थंडीचा फटका
उमरखेड | प्रतिनिधी :
उमरखेड तालुक्यात गेल्या काही दिवसांपासून थंडीचा कडाका वाढू लागला असून, ग्रामीण भागात पहाटे आणि रात्रीच्या वेळी थंडीचा जोर अधिक जाणवत आहे. सकाळच्या सुमारास वातावरणातील गारवा वाढल्याने नागरिकांना हुडहुडी भरत आहे.
विशेषतः ग्रामीण भागातील शेतकरी, शेतमजूर, दूध उत्पादक तसेच सकाळी कामानिमित्त घराबाहेर पडणाऱ्या नागरिकांना थंडीचा सामना करावा लागत आहे. सकाळी शाळेत जाणाऱ्या विद्यार्थ्यांनाही थंडीपासून बचाव करण्यासाठी उबदार कपड्यांचा आधार घ्यावा लागत आहे.
थंडीपासून बचाव करण्यासाठी नागरिक ठिकठिकाणी शेकोट्या पेटवून उब घेताना दिसत आहेत. स्वेटर, कानटोपी, मफलर आणि इतर उबदार कपड्यांच्या वापरातही वाढ झाली आहे.
दरम्यान, बदलत्या हवामानाच्या पार्श्वभूमीवर नागरिकांनी आपल्या आरोग्याची काळजी घ्यावी. विशेषतः लहान मुले आणि ज्येष्ठ नागरिकांना थंडीपासून सुरक्षित ठेवावे, असे आवाहन करण्यात येत आहे.
सध्या वाढलेल्या थंडीमुळे उमरखेड तालुक्यातील ग्रामीण जनजीवनावर हिवाळ्याची चाहूल स्पष्टपणे जाणवू लागली आहे.








