समृद्धी महामार्गाजवळ जानेफळकडे जाणाऱ्या रस्त्यावर पांढऱ्या रंगाच्या इर्टिगा वाहनातून अंमली पदार्थ हस्तगत; सहा पुरुष आणि एका महिलेला ताब्यात घेतल्याची माहिती
मेहकर | प्रतिनिधी :
मेहकर पोलिसांनी गोपनीय माहितीच्या आधारे धडक कारवाई करत समृद्धी महामार्गाजवळ जानेफळकडे जाणाऱ्या रस्त्यावर एका पांढऱ्या रंगाच्या इर्टिगा वाहनातून तब्बल २० किलो गांजा जप्त केला. या प्रकरणी सहा पुरुष आणि एका महिलेला ताब्यात घेण्यात आल्याची प्राथमिक माहिती आहे. दोन ट्रॉली बॅगमधून हा गांजा आढळून आल्याचे समजते.
आज सकाळी समृद्धी महामार्गाच्या दिशेने येणाऱ्या पांढऱ्या रंगाच्या इर्टिगा वाहनामध्ये काही व्यक्ती गांजा हा अंमली पदार्थ घेऊन मेहकर येथे येणार असल्याची गोपनीय माहिती पोलिसांना मिळाली होती. या माहितीच्या आधारे पोलिसांनी सापळा रचून संबंधित वाहनाची तपासणी केली. या कारवाईत २० किलो गांजा आणि वाहन जप्त करण्यात आले.
ही कारवाई वरिष्ठ पोलीस अधिकाऱ्यांच्या मार्गदर्शनाखाली करण्यात आली. यावेळी उपविभागीय पोलीस अधिकारी खाडे साहेब, जानेफळचे ठाणेदार माळी साहेब, एएसआय काळे, जेरवाल मॅडम, ठाकरे, कटक, शिवणकर, परसूवाले, अवचार तसेच शासकीय पंच आणि फोटोग्राफर उपस्थित होते. व्यंकटेश्वर आलेवार साहेब यांच्या मार्गदर्शनाखाली ही कारवाई पार पडल्याची माहिती देण्यात आली.
या प्रकरणी संबंधित व्यक्तींना ताब्यात घेण्यात आले असून, गुन्हा दाखल करण्याची प्रक्रिया सुरू असल्याची प्राथमिक माहिती आहे. पोलिसांच्या या धडक कारवाईमुळे परिसरात खळबळ उडाली आहे.











