रागिनी स्टुडिओ, मेहकरच्या दोन्ही लघुपटांची यशस्वी घोडदौड; बुलढाणा जिल्ह्याच्या शिरपेचात मानाचा तुरा
मेहकर | प्रतिनिधी :
माजी मंत्री बच्चू कडू यांच्या प्रहार चित्रपट संघटनेच्या वतीने आयोजित करण्यात आलेल्या ‘प्रहार लघुपट स्पर्धे’च्या अंतिम फेरीसाठी निवडलेल्या ९६ लघुपटांमध्ये मेहकर येथील रागिनी स्टुडिओ निर्मित ‘मी हरलो नाही…’ आणि ‘साथ एकनाथांची…’ या दोन्ही लघुपटांची अधिकृत निवड झाली आहे. या निवडीमुळे मेहकरसह बुलढाणा जिल्ह्याच्या चित्रपट निर्मिती क्षेत्रात आनंदाचे वातावरण निर्माण झाले आहे.
उपमुख्यमंत्री एकनाथ शिंदे यांच्या वाढदिवसानिमित्त आयोजित या लघुपट महोत्सवात तब्बल ११ लाख रुपयांची रोख पारितोषिके आणि ‘प्रहार करंडक’ प्रदान करण्यात येणार आहेत. याबाबतची माहिती प्रहार चित्रपट संघटनेचे संदीप मोहिते यांनी दिली.
विशिष्ट विषयावर आधारित या स्पर्धेत देशभरातून शेकडो लघुपटांच्या प्रवेशिका दाखल झाल्या होत्या. परीक्षक मंडळ आणि त्यांच्या टीमने विविध फेऱ्यांमधून परीक्षण करून अंतिम फेरीसाठी देशभरातील ९६ दर्जेदार लघुपटांची निवड केली. या प्रतिष्ठेच्या यादीत रागिनी स्टुडिओच्या दोन्ही लघुपटांनी स्थान मिळवले आहे.
‘मी हरलो नाही…’ आणि ‘साथ एकनाथांची…’ या लघुपटांचे दिग्दर्शन प्रमोद ताजने यांनी केले आहे. कथा लेखन आणि दिग्दर्शनाची जबाबदारीही त्यांनी सांभाळली आहे. छायाचित्रण सुनील अंभोरे आणि रामदास भगत (रागिनी स्टुडिओ, मेहकर) यांनी केले आहे. संगीत गणेश कांडेकर यांनी दिले असून, मेकअप आणि हेअरची जबाबदारी संजीवनी नितीन मोरे यांनी पार पाडली.
या लघुपटांमध्ये गणेश चहारे, पल्लवी चापले, किसन बळी, सुरेखा सुरुशे, डॉ. सुभाष खुरद, राजू रोकडे, गणेश मुंढे, अनुष्का सुरुशे, कोमल मोहड, पूनम ठोमरे, डॉ. अर्चना ठोसरे, सुनीता कुडके आदी कलाकारांनी विविध भूमिका साकारल्या आहेत. बालकलाकार आदित्य कानोडजे यांच्यासह गजानन नागोलकर, स्वप्नील काळासरे आणि संदीप काळे यांनी विशेष सहकार्य केले.
दिग्दर्शक प्रमोद ताजने हे आतापर्यंत अनेक महत्त्वाच्या सामाजिक विषयांवर लघुपट आणि व्हिडिओ साँग तयार करून समाजप्रबोधनाचे कार्य सातत्याने करीत आहेत. वास्तववादी आणि सामाजिक आशय असलेल्या विषयांना प्रभावी कलात्मक सादरीकरणाची जोड देत रागिनी स्टुडिओच्या संपूर्ण टीमने या दोन्ही लघुपटांच्या माध्यमातून आपली गुणवत्ता सिद्ध केली आहे.
प्रहार लघुपट स्पर्धेच्या अंतिम ९६ लघुपटांमध्ये अधिकृत निवड होणे ही मेहकरसह संपूर्ण बुलढाणा जिल्ह्यासाठी अभिमानाची बाब मानली जात आहे. या यशाबद्दल रागिनी स्टुडिओच्या संपूर्ण टीमचे सर्व स्तरांतून अभिनंदन होत असून, पुढील स्पर्धेसाठी त्यांना शुभेच्छा दिल्या जात आहेत.










