मांगरूळ शिवारातील घटना; शेतकरी पांडुरंग पिंपळकर यांचे ७० ते ८० हजार रुपयांचे नुकसान, पोलिसांत तक्रार दाखल
मारेगाव | प्रतिनिधी :
मारेगाव येथील शेतकरी पांडुरंग रामदास पिंपळकर यांचा बैल मांगरूळ शिवारात चारा चारण्यासाठी नेत असताना विद्युत खांबाला असलेल्या तंगव्याच्या तारेच्या संपर्कात आला. या तारेतून विद्युत प्रवाह उतरल्याने विजेचा धक्का बसून बैलाचा मृत्यू झाला. या घटनेमुळे शेतकरी पिंपळकर यांचे मोठे आर्थिक नुकसान झाले असून, त्यांनी मारेगाव पोलीस ठाण्यात तक्रार दाखल केली आहे.
मृत बैलाची अंदाजे किंमत ७० ते ८० हजार रुपये असल्याचे सांगण्यात येत आहे. सध्या दुष्काळी परिस्थितीमुळे शेतकरी आधीच आर्थिक संकटाचा सामना करीत आहेत. अशा परिस्थितीत शेतीच्या कामासाठी महत्त्वाचा असलेल्या बैलाचा मृत्यू झाल्याने पिंपळकर यांच्यावर आर्थिक संकट ओढवले आहे. बैलाअभावी दैनंदिन शेतीकामांवरही परिणाम होण्याची शक्यता आहे.
या घटनेला वीज वितरण कंपनीचा हलगर्जीपणा कारणीभूत असल्याचा आरोप शेतकऱ्यांनी केला आहे. विद्युत खांबाला असलेल्या तारेमुळे बैलाचा जीव गेला; मात्र याच ठिकाणी एखाद्या शेतकऱ्याला विद्युत धक्का बसून दुर्घटना घडली असती, तर त्याची जबाबदारी कोण घेतली असती, असा सवाल नागरिकांकडून उपस्थित केला जात आहे.
या घटनेत झालेल्या आर्थिक नुकसानीची भरपाई कोण देणार, तसेच अशा धोकादायक विद्युत तारांची दुरुस्ती आणि सुरक्षिततेची जबाबदारी कोणाची, असे प्रश्नही शेतकरी आणि नागरिकांनी प्रशासनासमोर उपस्थित केले आहेत. संबंधित वीज वितरण कंपनीने या घटनेची दखल घेऊन योग्य ती कार्यवाही करावी आणि नुकसानग्रस्त शेतकऱ्याला भरपाई द्यावी, अशी मागणी होत आहे.
🖊️ सारथी महाराष्ट्राचा न्यूज










