लातूर प्रतिनिधी :लातूर जिल्हा पोलीस दलातील पोलीस शिपाई भरती सन २०२४-२०२५ अंतर्गत “शारीरिक मोजमाप व शारीरिक मैदानी चाचणी” प्रक्रियेला शुक्रवार, दिनांक १३ फेब्रुवारी २०२६ रोजी पहाटे ४ वाजता पोलीस मुख्यालय, बाभळगाव (लातूर) येथे सुरुवात झाली आहे. भरती प्रक्रियेच्या पहिल्या टप्प्यात मोठ्या संख्येने उमेदवारांना बोलावण्यात आले होते.पोलीस प्रशासनाकडून मिळालेल्या माहितीनुसार, दिनांक १२ फेब्रुवारी रोजी एकूण ८४९ पुरुष उमेदवारांना शारीरिक मोजमाप व चाचणीसाठी उपस्थित राहण्याचे आदेश देण्यात आले होते.
मात्र त्यापैकी ४४९ उमेदवार प्रत्यक्ष प्रक्रियेत सहभागी झाले असून ४०० उमेदवार गैरहजर राहिल्याचे स्पष्ट झाले आहे.भरती प्रक्रियेस उपस्थित असलेल्या ४४९ उमेदवारांपैकी ४७ उमेदवार शारीरिक मोजमाप चाचणीत अपात्र ठरले. उर्वरित ४०२ उमेदवारांना १६०० मीटर धावणे, १०० मीटर स्प्रिंट आणि गोळाफेक अशा मैदानी चाचणीसाठी पात्र घोषित करण्यात आले. या उमेदवारांची मैदानी चाचणी घेण्यात आली असून त्यामध्ये मिळालेल्या गुणांची यादी लातूर पोलीस दलाच्या अधिकृत संकेतस्थळावर प्रसिद्ध करण्यात आली आहे. तसेच पोलीस अधीक्षक कार्यालय आणि पोलीस मुख्यालयाच्या दर्शनी भागावरही ती लावण्यात आली आहे.दरम्यान, प्रसिद्ध करण्यात आलेल्या गुणयादीबाबत उमेदवारांना काही आक्षेप असल्यास त्यांनी ४८ तासांच्या आत लेखी स्वरूपात ई-मेलद्वारे पोलीस अधीक्षक कार्यालयात नोंदवावा, असे आवाहन करण्यात आले आहे. ठरलेल्या वेळेनंतर प्राप्त होणाऱ्या आक्षेपांचा विचार केला जाणार नाही, असेही स्पष्ट करण्यात आले आहे.
पोलीस भरतीच्या पुढील टप्प्यात दिनांक १४ फेब्रुवारी २०२६ रोजी चालक पोलीस शिपाई पदासाठी येणाऱ्या उमेदवारांनी पहाटे ४ वाजता पोलीस मुख्यालय, बाभळगाव येथे उपस्थित राहणे आवश्यक आहे. उमेदवारांनी प्रवेशपत्र, ऑनलाईन अर्जाची प्रत, वाहन परवाना, चार पासपोर्ट साईज फोटो तसेच आधार कार्ड, पॅन कार्ड किंवा अन्य ओळखपत्र सोबत आणणे अनिवार्य आहे. सकाळी ९ वाजेपर्यंत मैदानावर हजेरी लावणे बंधनकारक करण्यात आले आहे.पोलीस अधीक्षक अमोल श्री. तांबे यांनी उमेदवारांना सूचित केले आहे की, शारीरिक मोजमाप चाचणीत पात्र ठरणाऱ्या उमेदवारांनाच पुढील मैदानी क्षमता चाचणीत सहभागी होता येईल. त्यामुळे उमेदवारांनी पूर्ण प्रक्रियेपर्यंत मुख्यालयात उपस्थित राहण्याची तयारी ठेवावी, असे आवाहन करण्यात आले आहे.
